Uly Otan soǵysy ardagerlerine qurmet kórsetý jalpymemlekettik aýqymdaǵy maqsat - G.Ábdiqalyqova

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqovanyń tóraǵalyǵymen Uly Otan soǵysyndaǵy Jeńistiń 71 jyldyǵyn merekeleýge daıyndyq máseleleri jónindegi jınalys ótti.

«Qazirgi kezde elimizde 3886 soǵysqa qatysýshy men soǵys múgedekteri, 22 myńnan astam soǵysqa qatysýshylarǵa teńestirilgen azamattar bar. Olarǵa jyl saıyn qurmet kórsetiledi. Osyǵan oraı biz búgin memlekettik organdardyń qandaı sharalar ázirlep jatqandyǵyn tyńdaıtyn bolamyz», - dedi jınalysty ashqan Memlekettik hatshy.

G.Ábdiqalyqova fashızmdi jeńý isine zor úles qosqan jáne tarıhı mıssııany oryndaǵan Uly Otan soǵysynyń ardagerlerine, tyl eńbekkerlerine, qazaqstandyqtarǵa qurmet kórsetý jalpymemlekettik aýqymdaǵy maqsat ekendigin atap ótti.

Sonymen qatar, ol ótkiziletin barlyq is-shara Qazaqstan Táýelsizdiginiń 25 jyldyǵy aıasynda ótýi qajettigi jáne elimizdiń qoǵamdyq-saıası turaqtylyǵyn qamtamasyz etýge, Memleket basshysynyń saıasaty aıasynda qoǵamdy biriktirýge, jas urpaqtyń patrıottyq sezimin nyǵaıtýǵa baǵyttalýy kerek ekendigin erekshe atap ótti.

Jınalys sońynda G.Ábdiqalyqova memlekettik organdarǵa birqatar tapsyrma berdi.