Uly Otan soǵysy ardagerleri men múgedekteri poıyzda tegin júredi - QTJ

ASTANA. 9 sáýir. QazAqparat - «Qazaqstan temir joly» UK» AQ Uly Jeńistiń 68 jyldyq mereıtoıyna oraı 2013 jyldyń 1 mamyrynan 31 jeltoqsanyna deıin Uly Otan soǵysynyń ardagerleri men múgedekterine jolaýshylar poıyzdarynda tegin jol júrý dástúrli aktsııasyn ótkizýde.

 Bul týraly «Jolaýshylar tasymaly» AQ baspasóz qyzmeti habarlady.

 Merekelik aktsııa aıasynda UOS ardagerleri men múgedekteri Qazaqstan Respýblıkasy men Táýelsiz Memleketter Dostastyǵy elderi aýmaǵynda temir jol kólikterinde tegin júre alady. Ardagerler «Talgo» zaýyty shyǵarǵan vagondardan quralǵan poıyzdardan bólek, jolaýshylar poıyzdarynyń barlyq sanattary men baǵyttarynda, sonymen qatar qalaaralyq poıyzdarda da kýpelik vagondarmen júrý múmkindigine ıe.

Ardagerler tegin bıletti temir jol kassalarynan ala alady. Ózimen birge jeke kýáligi, sonymen qatar, UOS ardageri nemese múgedegi týraly kýáliginiń túpnusqasy men kóshirmesi bolýy qajet.

Aktsııany ótkizý týraly qajetti aqparatty «Jolaýshylar tasymaly» AQ-nyń temirjol kassalary men táýlik boıy jumys isteıtin «105» anyqtama telefonynan alýǵa bolady.