«Uly dalanyń ulttyq dástúrleri» forýmy: 5 elden 700 ártis qatysty

ASTANA. QazAqparat - «Uly dalanyń ulttyq dástúrleri» atty halyqaralyq forým Atyraýda alǵash ret ótkizilýde jáne eki kúnge sozylady. Forým aıasynda birqatar mádenı jáne ǵylymı is-sharalar ótedi dep habarlady Atyraý oblysynyń Óńirlik kommýnıkatsııalar qyzmeti.

«Kórisý», «Jańa jasyńmen, Uly dalam» ulttyq dástúrlerdi jalǵastyrýǵa arnalǵan aýqymdy teatrlandyrylǵan festıval I.Taımanov pen M.Ótemisuly atyndaǵy ortalyq qalalyq alańda ótti.

Atalǵan is-sharanyń halqymyzdyń  salt-dástúrlerin, mádenıetimizdi, ómir súrý salttaryn odan ári baıytý jáne jas býyndy qalyptastyrý úshin mańyzy zor. Іs-sharada 700-deı ártis, 5 eldiń ókilderi, Túrkııa, Ázerbaıjan, Qyrǵyzstan, Reseı men Ózbekstannan kelgen 30 shyǵarmashylyq uıym  óner kórsetti.

Atyraý oblysynyń etno-mádenı birlestikteriniń ókilderi óz kıiz úılerin ornatyp, mereke qonaqtaryna ulttyq taǵamdaryn usyna otyryp, mádenı salt-dástúrlerin kórsetti.

Sonymen qatar qalalyq alańda árkim ulttyq sport túrlerinen óz kúshterin synaı aldy.

Festıvaldyń ashylýyna myńdaǵan kórermen jınaldy.

Atyraý oblysynyń ákimi Nurlan Noǵaev óziniń quttyqtaý sózinde «Kórisýdi» merekeleýdiń respýblıka aýmaǵynda turatyn barlyq halyqty jaqyndastyratyn dástúrdiń biri retindegi qazaq halqy úshin mańyzdylyǵyn atap ótti.

«Memleket basshysy, Qazaqstannyń tuńǵysh Prezıdenti Nursultan Nazarbaev óz sózderinde bul ómirde óz ornyn tabý úshin árbir ult birtutas, básekege qabiletti bolýy qajet dep birneshe ret atap kórsetti. Búgin bizdiń elimizde ómir súrip jatqan barlyq ulttardyń birlik pen kelisimde ómir súrýi úshin barlyq jaǵdaı jasalǵan. Qazaqstannyń álemdik qaýymdastyqta alatyn orny erekshe. Memleket Basshysynyń bastamalaryn birqatar elderdiń basshylary úlgi etýde. Birinshi kezekte bul qoǵamdyq kelisimniń, saıası turaqtylyqtyń, beıbitshilik pen tynyshtyqtyń belgisi. Barlyq qazaqstandyqtar Ult Kóshbasshysyn qoldaıdy», - dedi Nurlan Noǵaev..

«Uly dalanyń ulttyq dástúrleri» Halyqaralyq forýmy Memleket basshysynyń «Rýhanı jańǵyrý» baǵdarlamalyq maqalasyn oryndaý aıasynda ótkizilýde jáne eki kúnge sozylady. Іs-sharanyń basty maqsaty - qazaq halqynyń ulttyq salt-dástúrlerin tanymal etý.

Osy eki kún ishinde Forým qonaqtary Yrza Tursynzadanyń etnoqolóneriniń sheberlik saǵattaryna qatysa alady. Forým aıasynda respýblıkalyq aıtys pen Qazaqstannyń halyq ártisi Baqyt Qarabalına atyndaǵy kúıshi-dombyrashylar saıysy ótedi. Absolıýtti salmaq kategorııalaryndaǵy sportshylardyń qatysýymen ótetin qazaq kúresinen halyqaralyq ashyq chempıonat Forým aıasyndaǵy kópshilik  sporttyq is-sharalardyń biri bolmaq. Osy kúni Atyraý qalasynyń turǵyndary men qonaqtary «Spıker №7» jastar zııatkerlik konferentsııasyna qatysa alady.

Forýmnyń alǵashqy kúni I.Taımanov pen M.Ótemisuly atyndaǵy alańda jergilikti ártister men «Ringo» toby, Nurbolat Abdýllın, Álı Oqapov, Táýekel Músilim jáne Qaırat Nurtas sııaqty qazaqstandyq estrada juldyzdarynyń qatysýymen ótetin keshki kontsertke ulasady.

15 naýryzda Qazaqstannyń, Jaqyn Shyǵys pen Eýropa elderiniń ǵalymdary «Naýryz - adamzattyń materıaldy emes qundylyǵy retinde» atty halyqaralyq ǵylymı-tájirıbelik konferentsııaǵa qatysady. Munaıly astananyń qonaqtary Farıza Ońǵarsynovanyń shyǵarmashylyǵyna arnalǵan respýblıkalyq ádebı oqýdy,  «Uly dala ulaǵaty» atty kitaptyń tusaýkeserin, «Dombyra Party» jastar aktsııasyn tamashalaı alady.

Eki kúndik Forým konkýrs jeńimpazdaryn marapattaýmen jáne «Amanat» qoǵamdyq ulttyq syılyǵyn tapsyrýmen aıaqtalady.