«Uly dalanyń Túrkistany» atty respýblıkalyq fotoekspedıtsııa bastaldy
Ekspedıtsııa maqsaty - «Rýhanı jańǵyrý» baǵdarlamasy men «Uly dalanyń jeti qyry» maqalasyndaǵy mindetterdi oryndaý, óńirdiń kıeli jáne týrıstik oryndaryn nasıhattaý.
Atalǵan fotoekspedıtsııa Túrkistan oblystyq ishki saıasat basqarmasynyń uıymdastyrýymen jáne aýdan, qala ákimdikteriniń qoldaýymen ótip otyr. Respýblıkalyq deńgeıdegi ekspedıtsııaǵa «Fotoóner» qoǵamdyq birlestiginiń tóraǵasy Asylhan Ábdiraıymuly (Almaty) bastaǵan fototilshiler qatysýda. Atap aıtsaq, Nur-Sultan, Almaty, Shymkent qalalary men ShQO, Jambyl, Qyzylorda, BQO jáne Túrkistan oblysynan 15 kásibı fototilshi shaqyrylǵan. Olardyń arasynda Balmurat Orynbaı, Ońǵarbek Alharov, Mereı Qaınaruly, Aıtjan Murzanov, Qaırat Shaltaqbaev jáne ózge de tanymal fotograftar bar.
Sýret salasynyń maıtalmandary Túrkistan, Kentaý qalalarymen qatar, Sozaq, Báıdibek, Otyrar, Saıram, Tóle bı, Túlkibas jáne Qazyǵurt aýdanynyń kıeli jáne týrıstik oryndaryn sýretke túsiredi. Bir aptaǵa sozylatyn ekspedıtsııada túsirilgen týyndylar 17 maýsymda Túrkistan qalasynda ótetin «Uly dalanyń Túrkistany» atty sýret kórmesinde el nazaryna usynylady.
Elimizdiń eń tańdaýly fotograftary Túrkistan qalasynda atqarylyp jatqan jumystar men ózgeristerge rızashylyqtaryn bildirdi. Olar týrıstik jáne kıeli oryndardyń kóp shoǵyry ornalasqan Túrkistan oblysynyń tarıhı eskertkishteri men oryndaryn sýretke túsirip, jurtshylyqqa jetkizetinin aıtty.
Eske sala keteıik, 2019 jyly 19 maýsymda Elbasy, QR Tuńǵysh Nursultan Nazarbaevtyń Jarlyǵymen Túrkistan oblysy qurylǵan bolatyn. Bul aqjoltaı jańalyqty qazaq halqy ǵana emes, túrkitildes memleketter de qýanyshpen qabyldady. Osy bir jyl kóleminde Túrkistanda aýqymdy jumystar qolǵa alyndy.