«Uly dala joryǵynyń» bıylǵy jeńimpazdaryn 65 mln teńge júlde kútip tur

ASTANA. QazAqparat - Qazaqstanda Astana-Túrkistan baǵyty boıynsha «Uly dala joryǵy» marafon-báıgesiniń ekinshi maýsymy ótedi, dep habarlaıdy QazAqparat.

Joba 6 qyrkúıek saǵat 14.00-de Qarajar (Ilınka) aýylynan bastalady.

Osy shara qarsańynda - 5 qyrkúıekte elordadaǵy «Qazanat» ıppodromynda 18.00-de respýblıkalyq ulttyq sport túrleriniń festıvali aıasynda joryqtyń saltanatty tusaýkeseri ótedi.

Uzyndyǵy 1300 shaqyrym bolatyn marshrýt Aqmola, Qaraǵandy, Ulytaý, Qyzylorda jáne Túrkistan oblystaryn basyp ótip, 19 qyrkúıekte Túrkistan qalasynda óz máresine jetedi.

Marafon 14 bólikke (birinshi jáne sońǵy kúni 50 shaqyrymnan; qalǵan kúnderi 100 shaqyrymnan) bólingen.

Jobanyń júlde qory - 65 mln teńge. Jeńimpaz komanda 30 mln teńge, ekinshi oryn ıegerleri - 20 mln teńge, qola júldegerler - 15 mln teńge alady.

Marafon jumysyna 2 halyqaralyq, 2 qazaqstandyq sýdıa jáne 2 halyqaralyq, 3 qazaqstandyq veterınar shaqyryldy.

«Uly dala joryǵy» jobasyn respýblıkalyq «JORYQ» at sporty federatsııasy Qazaqstan Respýblıkasy Mádenıet jáne sport mınıstrliginiń, «Amanat» partııasynyń, QR Ulttyq sport túrleri qaýymdastyǵynyń qoldaýymen júzege asyrady.

Jobanyń basty seriktesi - Týrızm jáne sport ındýstrııasyn qoldaý qory. Aqparattyq seriktes - «Qazaqstan» RTRK.

Tolyǵyraq aqparatpen joryq.kz saıtynan tanysýǵa bolady.