Uly Dala zary: Mádenıet mınıstrligi Oskarǵa usynylǵan fılmge qandaı qoldaý kórsetedi
Álemniń úzdik kınopremııasynyń qorytyndysy 2021 jyldyń sáýir aıynda shyǵady. Al bul rette Mádenıet jáne sport mınıstrligi atalmysh fılmdi álem elderiniń kórermenderine jarnamalap, ilgeriletýge atsalysa ma? Atsalyssa mınıstrlik fılmdi sheteldik aýdıtorııaǵa tanystyrýda naqty qandaı kómek nemese qoldaý kórsetedi? Bul suraqty QazAqparat tilshisi Mádenıet jáne sport mınıstrligine joldaǵan edi.
«Uly Dala zary» fılmi 1920-30 jyldary asharshylyq kezinde el halqynyń ashtyqtan qaza tapqandyǵy jaıly naqty tarıhı oqıǵalarǵa negizdelgen. Fılmniń ıdeıasy qasiretke toly qıyn-qystaý jyldardy kórsetý emes, sol qıyndyqtar men ozbyrlyqqa qaramastan ómir súre alǵan rýhy bıik halyqtyń bir-birine degen ózara kómegin kórsetý. Bul fılm Qazaqstandaǵy asharshylyqqa arnalǵan alǵashqy týyndy ekenin atap ótken jón», - dep jaýap berdi vedomstvo.
Mınıstrliktiń habarlaýynsha, Qazaqstandaǵy Oskar komıssııasy 2005 jyly Qazaqstan Kınematografıster odaǵy janynan qurylǵan. Onyń quramynda myna mamandar bar: I. Vovnıako (tóraǵa), A. Áshimov, O. Boretskıı, F. Sháripov, F. Abdraımov, A. Asenov jáne Q. Tórebaı (hatshy). Atalǵan komıssııanyń sheshimimen álemdik deńgeıdegi «Oskar» syılyǵyna bıyl elimizdiń atynan «Uly Dala zary» fılmi usynylyp otyr.
«Uly Dala zary» fılmin mınıstrlik tarapynan elimizde jáne shetelde ilgeriletý maqsatynda jyl saıyn uıymdastyrylatyn «Qazaqstan kıno kúnderi» aıasynda kórsetýge jáne aqparattyq qoldaý bildirýge daıyn ekendigin jetkizemiz», - deıdi mınıstrliktiń baspasóz qyzmeti.