«Uly dala» shyǵarmashylyq baıqaýy jarııalandy
Elbasynyń «Uly dalanyń jeti qyry» maqalasy tarıhymyzdy durys túsinip, qabyldaýǵa shaqyrady. Ondaǵy basymdyqtardy júzege asyrýǵa «Nur Otan» partııasy da tikeleı atsalysatyn bolady. Osy baǵyttaǵy jobalardyń biri - jas aqyn-jazýshylarǵa arnalǵan «Uly dala» shyǵarmashylyq baıqaýy.
«Nur Otan» partııasy Tóraǵasynyń Birinshi orynbasary Prezıdent maqalasynyń máni men mańyzyna toqtalyp ótti. Ol bul maqalanyń ult tarıhyn tanýdyń jańa kezeńin bastap bergenin jáne bizdiń álemdik órkenıet pen jahandyq damýǵa qosqan úlesimizdi dúnıejúzine jańasha dáripteýge úndeıtinin aıtty.
Baıqaý óz shyǵarmalarynda elimizdiń rýhanı jańǵyrýy men damýyn sýretteıtin, qazirgi zamanǵy shyndyqty túsinýge jáne qazaqstandyqtardyń dúnıetanymyn qalyptastyrýǵa yqpal etetin talantty jas ádebıetshilerdi anyqtaýdy kózdep otyr.
Baıqaýǵa 18 ben 40 jas aralyǵyndaǵy qalamgerler qatysa alady. Qatysýshylardyń jumystary 2018 jyldyń 28 qarashasy men 2019 jyldyń 15 qańtary aralyǵynda qabyldanady. Nátıjesinde «Proza», «Poezııa», «Dramatýrgııa, kórkem fılmder men teleserıaldar stsenarıi», «Pýblıtsıstıka» jáne «Balalarǵa arnalǵan shyǵarmalar» sııaqty bes birdeı atalym boıynsha jeńimpazdar men júldegerler anyqtalmaq. Ár atalymnyń jeńimpazyna - 1,5 mıllıon, 2-oryn ıegerlerine - 750 myń, al 3-oryn alǵan qatysýshylarǵa 500 myń teńgeden beriledi.
Baıqaýdyń basqa da sharttary týraly aqparatty partııanyń resmı saıtynan bilýge bolady.
Oljas Omarbek