«Uly dala muragerleri» ekspedıtsııasy Reseıden qundy derekter jınastyryp qaıtty
Joryqty uıymdastyrǵan «Ǵylymı zertteýlerdi qoldaý qory» jeke qorynyń dırektory, ólketanýshy Aıbolat Qurymbaevtyń aıtýynsha, onshaqty kúnge sozylǵan ekspedıtsııa sapar barysynda Astrahan, Pıatıgorsk, ıAlta, Baqshasaraı qalalarynda boldy.
Basty maqsat - Qazaqstan tarıhynda erekshe oryn alatyn Bókeı handyǵynyń ótkenin túgendeý. Mysaly, Astrahan qalasynda 1812 jyldan gýbernator bolǵan Stepan Andreevskııdiń (1760-1818) úıi bar. Bókeı han uly Jáńgirdi eýropasha bilim alýy úshin bala kezinde osy gýbernatordyń tárbıesine bergen bolatyn.
Sondaı-aq Pıatıgorsk qalasynda Kavkazda qyzmet etken, ómiriniń sońǵy jyldarynda Kıslovodsk bekinisiniń komendanty bolǵan general S.Merlınıdiń (1775-1833) jesiri Ekaterına Merlınıdiń úıi bar eken. Jáńgir han Fatıma hansha ekeýi osy úıde aıaldap, emdelgen.
Al ıAltada knıaz Shyńǵyshannyń (Ǵubaıdolla Jáńgirovtiń) úıi saqtalǵan. Jáńgir hannyń qos uly, polkovnık Ahmetkereı men qazaqtan shyqqan tuńǵysh kavalerııa generaly Ǵubaıdolla Jáńgirov ómiriniń sońǵy jyldaryn osynda ótkizgen.
«Baqshasaraıda ornalasqan mýzeıde Bókeı men Jáńgirdiń han retinde taqqa otyrǵan sátinde syıǵa tartylǵan qylyshtary saqtalǵan eken. Elge tarıhı qujattar, fotosýretter, kitaptar ákelindi. Ekspedıtsııa nátıjesi boıynsha kitapsha ázirlenetin bolady», dedi QazAqparat tilshisine A.Qurymbaev.
Aıta keteıik, ekspedıtsııa quramynda sondaı-aq sýretshi, Qazaqstan Sýretshiler odaǵynyń múshesi Bekjan Jumabaev, qazaq ulttyq mýzykalyq aspaptaryn jasaý sheberi Janpeıil Seıtaqov, «Legkıı kazahskıı» kitabynyń avtory Artýr Nurmuhambet boldy.