«Uly dala» festıvali ótetinin estip, Pavlodarǵa arnaıy keldik - «Jigitter» toby
Festıvaldiń ortalyq sahnasynda Qazaqstan estrada juldyzdary «Jigitter» toby, Ernar Aıdar, Álisher Kárimov, «Bastaý» toby jáne jergilikti ónerpazdar án salyp, bı bıledi. «Jigitter» tobynyń múshesi byltyr ótken «Uly dala» festıvalin áleýmettik jeliden kórip, bıyl ózderi arnaıy kelgenderin jetkizdi.
«Jazdyń jaımashýaq kúninde Ertistiń jaǵasynda esten ketpes dýman ótip jatyr, - deıdi «Jigitter» tobynyń múshesi Erdos Qanaev. - Óskeleń urpaq keıbir salt-dástúrimizdi, qundylyqtarymyzdy umytyp jatyr. Bul - ótkenimizdi eske túsiretin, rýhymyzdy kóteretin keremet shara. Ertis óńirine jıi kelip turamyz. Bul joly 10 shaqty án shyrqaımyz. Іshinde jańa ánderimiz de bar. Oǵan qosa, «Uly dala» festıvaliniń gımnyna aınalǵan jergilikti aqyn Asyǵat Turǵanbektovtyń sózine jazylǵan ándi aıttyq. Bıyl tobymyzdyń qurylǵanyna 15 jyl tolyp otyr. Sondyqtan aldaǵy ýaqytta Pavlodarǵa jeke kontsertimizben kelip qalýymyz da múmkin. Barsha jurtshylyqty merekelerimen quttyqtaımyz».
Basty sahnadaǵy kontserttik baǵdarlamany elimizge tanymal aıtysker aqyn Amanjol Áltaev arnaýymen bastady. Sonymen qatar, kontserttik baǵdarlama barysynda parashıýtshiler aspannan «Uly dala» logotıpi bar 100 kg kámpıtten shashý jasady.
Eske salaıyq, keshki saǵat 20:00-de «Uly dala» etnofestıvaliniń jabylýyna oraı «Ertis promenade» sahnasynda Qazaqstan estrada juldyzdarynyń qatysýymen gala-kontsert ótedi.