«Uly Dala eline saıahat» ekspedıtsııasy qorytyndylandy

ASTANA. QazAqparat - Búgin Astanada atalǵan ekspedıtsııany uıymdastyrýshy «Kazakh Tourism» ulttyq kompanııasynyń basshylyǵymen beıresmı kezdesý ótti, dep habarlaıdy QazAqparat tilshisi.

Belgilengen josparǵa saı, 3 aıdyń ishinde ekspedıtsııa qatysýshylary elimizdegi mańyzdy tabıǵı nysandarǵa aparatyn 6 baǵyt boıynsha, Qazaqstannyń 11 oblysyn qamtyǵan 17 myń shaqyrymnan astam jol júrip, ondaǵan tabıǵı orynǵa, saıabaqtar men qoryqtarǵa baryp qaıtty. 

Top quramynda saıahatshylar, týrfırma ókilderi, sheteldik jáne qazaqstandyq trevel-blogerler men fotograftar jáne BAQ ókilderi boldy.

«Ekspedıtsııanyń maqsaty - elimizdiń ásem jerlerin aralap qana qoımaı, jańa týrıstik marshrýttardy ashý. Osy oraıda qatysýshylar elimizdiń 60-qa tarta tarıhı jáne týrıstik aımaqtarynda boldy. Endigi jumys - jınalǵan materıaldar men aqparattardy saralap, jańa týrıstik marshrýttardy ashý jáne ony qujattandyrý isine kirisý. Sol jumystar aıaqtalǵan soń jańa týrıstik baǵyttar ashylady. Bul jerde ekspedıtsııa quramyndaǵylardyń róli erekshe, óıtkeni olar týrıstik jerlerdi óz kózimen kórgendikten, bizge tıisti usynystardy beredi. Usynystardy jyl sońyna deıin qarastyramyz», -dedi «Kazakh Tourism» AQ basqarma tóraǵasy Rashıd Kúzembaev.

Atalǵan ekspedıtsııany Astana qalasynyń 20 jyldyǵyna oraı QR Mádenıet jáne sport mınıstrligi Týrızm ındýstrııasy komıtetiniń tapsyrysy boıynsha «Kazakh Tourism» ulttyq kompanııasy uıymdastyrǵan bolatyn.

Buǵan deıin habardar etkenimizdeı, «Uly Dala eline saıahat» jobasy - Qazaqstan terrıtorııasyna jasalǵan eń iri ekspedıtsııalardyń biri. Ekspedıtsııa 2018 jyldyń 18 shildesi men 29 qyrkúıegi aralyǵynda «Tıan-Shan marjany», «Jońǵar Alataýy» (Almaty oblysy), «Altaı - órkenıet besigi» (ShQO), «Saryarqa» (Aqmola, Pavlodar, Qaraǵandy, Qostanaı oblystary), «Teńizden teńizge deıin» (Qyzylorda, Aqtóbe, Mańǵystaý oblystary), «Jańa Jibek joly» (Túrkistan, Jambyl, Almaty oblystary) baǵyttary boıynsha júrip ótti.