«Uly Dala eli»: Qazaqtyń handary da, batyrlary da myqty bolǵan - Ǵ.Qapaqov

ORAL. QazAqparat - Uly dala tórinde at oınatqan qazaqtyń handary da, batyrlary da myqty bolǵan. Oǵan Qazaq handyǵynyń 550 jyldyǵyna arnalǵan «Uly Dala eli» respýblıkalyq tarıhı-mádenı ekspedıtsııasy kezinde taǵy bir kóz jetkizdik. Bul týraly Qazaqstan halqy BQO assambleıasy tóraǵasynyń orynbasary Ǵaısa Qapaqov málim etti.

Onyń aıtýynsha, batysqazaqstandyqtar ekspedıtsııaǵa qatysqan atyraýlyqtardy shekaradan erekshe kóńil-kúımen, qonaqjaılylyqpen qarsy aldy. Tarıhı joryqqa qatysýshylar Esim han, Baıbaraq batyr, Jantóre hannyń beıitterinde bolyp, taǵzym etti. Oral qalasy tóńiregindegi Jaıyq qalashyǵyna soǵyp, kezinde Bókeı men Jáńgir han retinde kóterilgen Han toǵaıynda aıaldady. Sodan keıin Syrym eli arqyly Ábilqaıyr han júrgen jerlermen estafetany aqtóbelikterge tabys etti.

Qazaq eliniń qazirgi kók tiregen Astanasynan bastaý alǵan Qazaq handyǵynyń 550 jyldyq mereıtoıy eki myń jyldyq tarıhy bar kóne Tarazda márege jetýiniń ózinde aıryqsha mán bar. Munyń bári bizdiń ata-babalarymyzdyń kóregen danalyqpen ári asqan batyrlyqpen osynshama jerdi saqtap qalǵandyǵyn kórsetedi.

«Uly Dala eli» ekspedıtsııasy óz maqsatyna jetti. Biz kóp qyrly tarıhı tamyrymyzdyń tereńde ekendigin sezine tústik. Endigi maqsat - keń baıtaq jerimizdi keler urpaq úshin saqtaı bilý. Ekspedıtsııa kezinde jınaqtalǵan derekterdi ǵalymdarymyz zerttep, paıdaǵa asyra bilse, tipti jaqsy. Eń bastysy, baı tarıhymyzben biz qashanda maqtana alamyz», - dedi Ǵ.Qapaqov.