Ulttyq joǵary oqý oryndaryna túsý talaby qandaı

NUR-SULTAN. QazAqparat – Bıyl UBT qorytyndysy boıynsha shekti baldy 103 myńnan astam adam jınady. Bul týraly Ǵylym jáne joǵary bilim mınıstriliginiń baspasóz qyzmetinen málim etti, dep habarlaıdy QazAqparat tilshisi.

«Bıyl 154 myń talapker Ulttyq biryńǵaı testileýden ótti. UBT qorytyndysy boıynsha shekti baldy 103 myńnan astam adam jınady, bul – qatysýshylardyń jalpy sanynyń 67 paıyzy. Byltyrǵy nátıjemen salystyrǵanda bul kórsetkish 7 paıyzǵa joǵary. Bıyl ortasha ball 66-ny qurady», - delingen mınıstrlik málimetinde.

UBT qorytyndysy boıynsha keminde 65 ball jınaǵan talapkerler ulttyq joǵary oqý oryndaryna, keminde 50 balmen basqa joǵary oqý oryndaryna túse alady.

«Bul rette «Pedagogıkalyq ǵylymdar» jáne «Quqyq» bilim berý salalary boıynsha shekti ball keminde 75-ti, «Densaýlyq saqtaý» − keminde 70 ball, «Aýyl sharýashylyǵy jáne bıoresýrstar», «Veterınarııa» – keminde 60 baldy quraıdy», - dep atalyp ótken vedomstvo habarlamasynda.

Granttar taǵaıyndaý jónindegi sheshimdi Respýblıkalyq konkýrstyq komıssııa qabyldaıdy. Konkýrstyq komıssııanyń otyrysy 10 tamyzǵa deıin ótedi.

Budan buryn habarlanǵandaı, 80 myńǵa jýyq talapker bilim granttaryn taǵaıyndaý konkýrsyna qatysýǵa ótinish berdi.

Aıta keteıik, 2022-2023 oqý jylynda bakalavrıatqa 73 myńǵa jýyq grant bólindi.

Halyqtyń áleýmettik osal toptaryna bólinetin granttar sany kóbeıtildi.