Ulttyq jobalar qalaı iske asyrylýda – Qarjy mınıstriniń jaýaby

ASTANA. QazAqparat – 2022 jyly mektep salý esebinen 10 471 jumys orny quryldy. Bul týraly Májiliste 2022 jylǵy respýblıkalyq bıýdjettiń atqarylýy týraly Úkimettiń esebin tanystyrý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«2022 jyly 3 memlekettik baǵdarlama jáne 10 ulttyq joba júzege asyryldy. Olar Memlekettik josparlaýdyń jańa júıesin iske asyrý aıasynda bekitilgen bolatyn. Túrli qarjylandyrý kózderinen 8,2 trln teńge, onyń ishinde respýblıkalyq bıýdjetten 2,8 trln teńge bólindi», - dedi E. Jamaýbaev.

Onyń atýynsha, «Bilimdi ult» sapaly bilim berý» ulttyq jobasyn iske asyrýǵa 227 mlrd teńge bólindi, 201 mlrd teńge ıgerildi, onyń 108 mlrd teńgesi – respýblıkalyq bıýdjet qarajaty.

«Mektepke deıingi tárbıemen jáne oqytýmen 3-ten 6 jastaǵy balalardyń 98,3% qamtylǵan. 136 myń oqýshy oryndyq 247 mektep paıdalanýǵa berildi,

1 003 mektep jańǵyrtý jobasy aıasynda qamtyldy. 2022 jyly mektep salý esebinen 10 471 jumys orny quryldy, onyń ishinde 6 692-si turaqty jumys oryndary», - dedi mınıstr.

Onyń sózine qaraǵanda, «Qýatty óńirler – eldi damytýdyń draıveri» ulttyq jobasyn iske asyrýǵa 2 trln teńgege jýyq qarajat josparlansa, onyń 98,4% ıgerildi. Aýyldarǵa densaýlyq saqtaý, bilim berý, áleýmettik qamsyzdandyrý, mádenıet, sport jáne agroónerkásiptik keshen salalary boıynsha memlekettik qyzmetshilerdi qosa alǵanda 4 221 maman tartylǵan.

«Byltyr 15,4 mln sharshy metr turǵyn úı paıdalanýǵa berildi. 130,7 myń otbasy turǵyn úı jaǵdaıyn jaqsartty», - dedi E. Jamaýbaev.

Sonymen qatar ol «Aýyl – el besigi» jobasy aıasynda 9 myń ýaqytsha jumys orny qurylǵanyn aıtty.

Budan buryn habarlanǵandaı, QR Joǵary aýdıtorlyq palatasynyń tóraǵasy Natalıa Godýnova ulttyq jobalar aıasynda josparlaý salasyna áli de nazar aýdarý kerek ekenin aıtty.