Ulttyq joba: 250 jańa mádenı nysan salynyp, otandyq fılmder úlesi artady

NUR-SULTAN. QazAqparat – 250 jańa mádenı nysan salynady. Bul týraly Ortalyq kommýnıkatsııalar qyzmetinde «Ulttyq rýhanı jańǵyrý» ulttyq jobasynyń maqsatyn túsindirý kezinde QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.

«Ekinshi baǵyt «El Rýhy» dep atalady jáne mádenıet salasynda qyzmetterdiń qoljetimdigin arttyrý boıynsha is-sharalar keshenin qamtıdy, sondaı-aq shetelde otandyq mádenı ónimdi dáriptep, tanymal etý eskerilgen. Bul maqsatta iriktelgen 13 is-shara jáne 2025 jylǵa qaraı 5 naqty kórsetkishke jetý josparlanǵan», - dedi A. Balaeva.

Osy oraıda ınfraqurylymdy damytý, onyń ishinde jańa mádenı nysandardy salý arqyly mádenıet salasynyń qyzmetimen aýyldar men shalǵaıdaǵy eldi mekenderdiń 92,5 paıyz turǵyny qamtylady. Mádenıet nysandaryna turǵyndardyń barýyn eki esege arttyrý josparlanǵan. Bul maqsat úshin 250 jańa mádenı nysan salynyp, 1 200 nysan kúrdeli jóndeýden ótkiziledi.

Mınıstrdiń aıtýynsha, eldiń shyǵarmashylyq áleýetin tikeleı qoldaý arqyly otandyq mádenı ónimdi jańǵyrtý júıesi qurylady. Sonyń ishinde kınoprokattaǵy otandyq fılmderdiń úlesin 25 paıyzǵa deıin jetkizý, «Qazaqanımatsııa» shyǵarmashylyq birlestigi bazasynda 40 anımatsııalyq fılm jasaý eskerilgen. Munymen qosa, shyǵarmashylyq bolashaǵy bar talanttardyń 150 jobasyna qoldaý jasalmaq.

A. Balaeva óz sózinde «E-culture.kz» biryńǵaı elektrondy platforma jobasyna toqtaldy. Joba otandyq mádenıettiń barlyq jetistikterine erkin rejımde onlaın túrde qol jetkizýge múmkindik beredi.

«Jer sharynyń kez kelgen núktesinen, úıden shyqpaı-aq, bizdiń murajaılar men teatrlarǵa, kitaphanalarǵa jáne basqa da mádenı kórikti jerlerge barýǵa bolady», - dedi vedomstvo basshysy.