Ulttyq ulannyń «Ońtústik» óńirlik qolbasshylyǵy soǵys ardagerleri men úzdik áskerı qyzmetshilerdi marapattady (FOTO)

ALMATY. QazAqparat - Búgin Almatyda «Ońtústik» óńirlik qolbasshylyǵynda Uly Jeńistiń 70 jyldyǵy men Otan qorǵaýshylar kúnine arnalǵan merekelik is-shara ótti.

Saltanatty shara barysynda Uly Otan soǵysy jyldarynda Qazaqstan halqynyń tyldaǵy qajyrly eńbekteri men qazaqstandyq jaýyngerlerdiń qan maıdandaǵy teńdesi joq erlikteri eske alyndy. Sondaı-aq, búgingi jıynǵa jınalǵan qaýym Uly Jeńis jolynda maıdan dalasynda qaza tapqan bozdaqtardy bir mınýt únsizdikpen eske alyp, rýhtaryna taǵzym etti.

Sonymen qatar, soǵys ardagerleri «Uly Jeńiske 70 jyl», úzdik áskerı qyzmetshiler men ózara árekettesýshi qurylymdardyń ókilderi «Otan qorǵaýshy», «Minsiz qyzmeti úshin» medaldarymen, «Qoǵamdyq tártipti saqtaǵany úshin» jáne «Ulttyq ulan qyzmetiniń úzdigi» tósbelgilermen marapattalsa, áskerı taqyrypqa qalam terbep júrgen buqaralyq aqparat quraldarynyń ókilderine arnaıy maqtaý qaǵazdary tabys etildi.

Solardyń ishinde «QazAqparat» halyqaralyq aqparattyq agenttiginiń tilshisi Gúlmıra Bıjaeva QR Ulttyq ulanynyń arnaıy maqtaý gramotasymen marapattaldy.

Shara barysynda Uly Otan soǵysynyń ardagerleri sóz sóılep, soǵys jyldaryn eske aldy. Búgingi jas Otan qorǵaýshylardy otandy súıýge, ony qorǵaýǵa qashanda daıyn bolýǵa bolýǵa shaqyrdy.

Óz sózinde QR Ulttyq ulany «Ońtústik» óńirlik qolbasshylyǵy áskerleriniń tárbıe jáne áleýmettik-quqyqtyq jumysy boıynsha orynbasary, polkovnık Nurbaı Bektursynov Qazaqstannyń Uly Jeńiske qosqan úlesiniń zor ekendigin atap ótti.

«Qazaq jeri mıllıondaǵan keńes áskerlerin kıimmen, azyq-túlikpen jáne qarý-jaraqpen qamtamasyz etip qana qoımaı, elimizge kelgen júzdegen myń adamǵa pana boldy. Soǵys jyldarynda Qazaqstanǵa 140 óndiris orny, ondaǵan ınstıtýttar, júzdegen myń mamandar kóshirildi. Olardan basqa, 100 myńnan astam polıak, 360 myńnan astam qýǵyn-súrginge ushyraǵan nemister jáne 507 myń Soltústik Kavkaz óńiri turǵyndarynyń qazaq jerinen pana tapqanyn aıtýǵa bolady. Osylaısha, Qazaqstan 1,5 mıllıonǵa jýyq adamnyń ekinshi otanyna aınaldy. Al búginde solardyń urpaqtary kópultty Qazaqstanda, qoǵamdyq turaqtylyq pen ultaralyq tatýlyqtyń arqasynda baqytty ómir súrip jatyr. Qazaqstannyń ósip-órkendeýine úles qosýda. Al Uly Otan soǵysy jyldaryndaǵy Qazaqstan halqynyń tyldaǵy jáne qan maıdandaǵy erlikteri eshqashanda umytylmaıdy» - dedi N. Baıtursynov.

Shara sońynda «Ońtústik» óńirlik qolbasshylyǵynyń kórkemónerpazdar ujymy ardagerlerdiń qurmetine kontsert berdi.