Ulttyq ulannyń arnaıy jasaǵyndaǵy 19 jaýynger kúreń beret ıelendi
Bıyl synaqtarǵa 80-nen astam áskerı qyzmetshi qatysty. Emtıhanǵa ruqsat alý úshin olar teorııalyq testileýden ótip, dene shynyqtyrý, bıiktiktegi daıyndyq, arnaıy qurylǵylarmen tómen túsý, baılanys daıyndyǵy, medıtsınalyq daıyndyq boıynsha synaq tapsyrdy.
Kúreń beretke úmitkerlerdiń qorytyndy kezeńinde aýa temperatýrasy 40 gradýstan joǵary boldy. Soǵan qaramastan olar taýly aımaqta 30 shaqyrym qashyqtyqty júgirip ótti.
«Qatty ystyqqa qaramastan úmitkerler «zıgzag» jáne «plastýn» tárizdi qozǵalý normatıvterin tapsyrdy. Okop qazý boıynsha synǵa tústi. «Jaralanǵan» joldasyn 100 metrge súırep apardy. Sodan keıin gazǵa qarsy maska kıgen qalpynda aýasy lastanǵan 400 metr jerdi eńserdi. Sodan keıin bastapqy júgirý mánerin qaıta jalǵastyrdy. Munyń bári belgilengen ýaqytta jáne belgilengen normatıvterge saı júrgizildi», – dedi «Zver» atty «Búrkit» arnaıy jasaǵynyń jaýyngeri.
Synaq kezinde ár úmitker fızıkalyq jáne psıhologııalyq kúızelisterge tap boldy. Olar kezikken qıyndyqtardy jeńip, márege jetý úshin komandalyq tózim, erik-jiger men uıymshyldyqty kórsetti. Synaqtyń sońǵy kezeńinde úmitkerler úsh metrlik beton qabyrǵalaryn eńserip, sozylǵan tikenek symnyń astynda plastýn tárizdi qozǵalyspen 200 metrlik kedergiler jolaǵynan jyljyp ótti.
Aıta ketý kerek, úmitkerlerdiń kúızeliske tózimdiligin nyǵaıtý úshin kedergiler jolaǵynyń janynda jarylystar uıymdastyrylyp, oq atylyp turdy. Mundaı ádis jaýyngerlik atmosfera týdyrady jáne úmitkerlerdiń kúızelis jaǵdaılaryndaǵy reaktsııasyn tekseredi.
Kedergilerden keıin birden úmitkerler jekpe-jek urysqa kiristi. Aldymen olar bir-birimen, sodan keıin kúreń beret ıelerimen shaıqasty. Aýyr soqqylarǵa tótep bergen jáne úsh mınýttyq úsh raýndqa shydap bergen úmitker ǵana kúreń beret ala alady.
«Bul synaqtan ótý men úshin umytylmas tájirıbe boldy. Sherýden jáne kedergilerden ótkennen keıin men jeńiske umtylǵan qarsylastarmen betpe-bet keldim. Jekpe-jek kúreń beretke jetý jolyndaǵy sońǵy synaq boldy. Sharshaý men aýyrsynýǵa qaramastan kúresýge tyrystym. Kúreń beret ıelerimen shaıqasqa túsý ońaı bolǵan joq. Degenmen boıdaǵy adrenalın sezimi meni alǵa jetelep otyrdy. Nátıjesinde barlyq úsh raýndqa da tótep bere aldym», – dedi «Rıchı» laqap atymen júrgen áskerı qyzmetshi.
Keıinirek, saltanatty jaǵdaıda, barlyq synaqtardan sátti ótken jáne sońǵy kezeńniń qıyndyqtaryna tótep bergen 19 úmitkerge qasterli kúreń beret tabystaldy.
«Sizder búgin fızıkalyq jáne moraldyq jaǵynan kúrdeli synaqtardan óttińizder. Sizderdiń adaldyqtaryńyz ben kásibılikterińiz jas urpaq úshin jáne barlyq tártip saqshylaryna úlgi. Bul sizderdiń komandırlerińizdiń, nusqaýshylaryńyzdyń jáne siz áskerı qyzmet ótkerip jatqan ujymnyń qoldaýy men daıyndyǵynyń arqasynda qol jetkizgen jetistikterińiz bolyp sanalady. Joǵary sheberlik pen birlesken qyzmet kez kelgen syn-tegeýrinder men qaýip-qaterlerge tótep berýge, Otanymyzdy qorǵaýǵa daıyn elıtal
yq bólimshelerdi qurýǵa yqpal etedi, – dedi QR Іshki ister mınıstri Marat Ahmetjanov.
»Memleket basshysynyń Ulttyq ulandy sandyq jáne sapalyq turǵyda nyǵaıtý jónindegi tapsyrmasyn iske asyrý maqsatynda jáne Іshki ister mınıstriniń nusqaýy boıynsha Ulttyq ulanda 2022 jyly arnaıy maqsattaǵy bólimshelerdiń sany ulǵaıtyldy. Áskerlerde biliktilik synaqtary jyl saıyn elimizdiń ártúrli klımattyq aımaqtarynda ótkiziledi. Aıta ketý kerek, búkil synaq marshrýtynan myqty daıyndyqpen kelgen úmitkerler ǵana óte aldy. Mysaly, búgin synaqtardyń barlyq kezeńderinen 19 áskerı qyzmetshi súrinbeı ótti. Men Ulttyq ulannyń Bas qolbasshylyǵynyń atynan jáne óz atymnan jańa arnaıy jasaq nyshanynyń ıegerlerin kúreń berettiler baýyrlastyǵyna kirýimen, al arnaıy jasaq ardagerlerin kezekti tolyqtyrýmen quttyqtaımyn«, – dedi QR Іshki ister mınıstriniń orynbasary – Ulttyq ulannyń Bas qolbasshysy Erkin Botaqanov.
Bıyl «Búrkit» arnaıy maqsattaǵy bólimshelerin damytýǵa qosqan erekshe úlesi úshin kúreń beret Іshki ister mınıstri Marat Ahmetjanovqa da tabys etildi.
Aıta ketý kerek, «Búrkit» arnaıy bólimshesiniń jaýyngerleriniń emtıhany men daıyndyq deńgeıi Ózbekstan Respýblıkasynan kelgen áriptester tarapynan da joǵary baǵaǵa ıe boldy. Olar Ulttyq ulan qolbasshylyǵyna qazaqstandyq arnaıy jasaqtyń ómirindegi mańyzdy tarıhı sátterdiń birine kýá bolýǵa múmkindik bergeni úshin rızashylyqtaryn bildirdi. Jyl saıyn áskerı qyzmetshilerdiń jaýyngerlik jáne arnaıy daıarlyq deńgeıin arttyrý, olardyń arnaýly bilim men daǵdylardy alýy jáne ıgerýi úshin bólimsheniń jaýyngerleri úshin qurmetti dep sanalatyn kúreń beret taǵý quqyǵyna biliktilik synaqtary júrgiziledi. Bul is-sharalar jyldyń ár mezgilinde, sondaı-aq jer bederiniń ártúrli aımaqtarynda ótkiziledi.