Ulttyq ulanda biliktilik arttyrý kýrstarynan ótken ofıtserlerge kýálikter tabystaldy
QR Qarýly Kúshteri Bas shtaby akademııasy fakýltetiniń baǵdarlamasy boıynsha barlyǵy 143 ofıtserge kýálik tapsyryldy, dep habarlaıdy QR Ulttyq ulanynyń baspasóz qyzmeti.
Ulttyq ulannyń mańyzdy mindetteriniń biri - kásibı-laýazymdyq daıarlyq jáne ofıtserlerdiń biliktiligin arttyrý. Osy maqsatta áskerde barlyq sanattaǵy áskerı qyzmetshilermen oqý-ádistemelik jıyndar jáne semınarlar turaqty túrde ótkizilip turady. QR Qarýly Kúshteri Bas shtaby akademııasy fakýltetiniń baǵdarlamasy boıynsha biliktilik arttyrý kýrstaryn ótkizý bastamasyn Ulttyq ulan Bas qolbasshysy general-leıtenant Rýslan Jaqsylyqov kótergen bolatyn. Rýslan Fatıhulynyń sheshimimen, 2016 jyldyń sáýir-qarasha aılarynda Ulttyq ulan Bas qolbashylyǵynda ofıtserlerdiń biliktiligin arttyrý kýrstary uıymdastyryldy. Ulttyq ulan Bas qolbasshylyǵynyń ofıtserlerimen qatar, kýrstyq daıarlyqtan Іshki ister mınıstrliginiń, Bas áskerı prokýratýranyń, sondaı-aq Ulttyq qaýipsizdik komıtetine qarasty Shekara qyzmetiniń qyzmetkerleri de ótti.
Dáristerdi Qazaqstan Respýblıkasy Tuńǵysh Prezıdenti - Ult Kóshbasshysy atyndaǵy Ulttyq qorǵanys ýnıversıteti Bas shtab fakýltetiniń oqytýshylyq quramy, QR Prezıdenti janyndaǵy Memlekettik basqarý akademııasynyń oqytýshylary, Syrtqy ister mınıstrliginiń, QR Prezıdenti janyndaǵy Qazaqstan strategııalyq zertteýler ınstıtýtynyń jáne «Áskerı-strategııalyq zertteýler ınstıtýty» aktsıonerlik qoǵamynyń qyzmetkerleri júrgizdi.
Atalmysh kýrstardyń maqsaty - ofıtserlerdi óńirlik qaýipsizdik, qorǵanys, memlekettiń áskerı uıymdarynyń ahýaly men damý perspektıvalary, operatıvtik sáıkestikti jetildirý jónindegi zamanaýı jańashyldyqpen tanystyrý, sonymen qatar áskerı strategııa, operatıvtik sheberlik jáne áskerdi basqarý jolynda ortaq múdde qalyptastyrý ekenin aıta keteıik.
Tyńdaýshylar aldynda sóz alǵan Ulttyq ulan Bas qolbasshysy Qorǵanys mınıstrligi men QR Tuńǵysh Prezıdenti - Ult Kóshbasshysy atyndaǵy Ulttyq qorǵanys ýnıversıtetiniń basshylyǵyna joǵaryda atalǵan kýrstardyń ótýine qoldaý kórsetkeni úshin alǵysyn bildirdi. Ol sondaı-aq, biliktilik kýrstarynyń ofıtserlerdiń bilimderi men qabiletterin shyńdaýǵa yqpal etetinin, memlekettiń áskerı salasy men ásker basqarý isine paıdasyn tıgizetinin atap ótti.
QR Tuńǵysh Prezıdenti - Ult Kóshbasshysy atyndaǵy Ulttyq qorǵanys ýnıversıtetiniń bastyǵy general-maıor Ashat Ryspaev ta óz kezeginde barlyq tyńdaýshylardy kýálikterimen quttyqtap, Ulttyq qorǵanys ýnıversıtetiniń biliktilikti arttyrýǵa arnalǵan osy tektes kýrstardyń, aǵartý sharalarynyń ótkizilýine kómek qolyn sozýǵa árqashan daıyn ekenin jetkizdi.
UQK Shekara qyzmetiniń Tárbıe, áleýmettik-quqyqtyq jáne kadrlyq jumystar bas basqarmasy bastyǵynyń mindetin atqarýshy polkovnık Nurlan Kerimbaev barlyq tyńdaýshylar atynan uıymdastyrýshylarǵa alǵys bildirdi.
Kýálikter tabystalǵan soń, Ulttyq ulan Bas qolbasshysynyń buıryǵymen QR Tuńǵysh Prezıdenti - Ult Kóshbasshysy atyndaǵy Ulttyq qorǵanys ýnıversıtetiniń basshylyǵy men professorlyq-oqytýshylyq quramyn marapattaý rásimi ótti.