Ulttyq ulan sarbazy ózine qol salmaq bolǵan er adamdy qutqaryp qaldy

AQTAÝ. QazAqparat – Aqtaý qalasynyń Atameken aýylynda Ulttyq ulannyń áskerı qyzmetshisi 4-qabattan sekirmek bolǵan er azamatty qutqaryp qaldy. Bul týraly Ulttyq ulannyń baspasóz qyzmeti málimdedi, dep habarlaıdy QazAqparat tilshisi.

«6 qyrkúıekte saǵat 12:15-te jaýyngerlik qyzmetten shyǵyp, úıine kele jatqan Ulttyq ulannyń áskerı qyzmetshisi Arman Murzamuratov tórtqabatty úıden sekirgeli turǵan er azamatty kóredi. Sál kidirip, azamattyń áreketin baqylaý barysynda onyń naqty sekirýge oqtalǵanyn ańǵarady. Jedel sheshim qabyldaǵan áskerı qyzmetshi joǵarǵy qabatqa kóterilip, er azamattyń artynan aqyryn kelip, qolynan ustap alady. Qarsylasqanyna qaramastan, ony qaýipsiz jerge alyp shyǵady. Keıin Arman Murzamuratov jaǵdaıdy polıtsııa qyzmetkerlerine habarlaǵan», - delingen Ulttyq ulannyń baspasóz qyzmeti taratqan habarlamada.

Vedomstvo aqparatyna sáıkes, qazir polıtsııa ózine qol salmaq bolǵan 24 jastaǵy azamattyń nelikten mundaı áreketke barǵanyn anyqtap jatyr.