Ulttyq ulan sarbazdary joldyń boıynda esinen tanyp qalǵan júkti áıeldi qutqardy

SEMEI. QazAqparat - Ulttyq ulan jaýyngerleri júkti áıeldi aman alyp qaldy, dep habarlaıdy QazAqparat.

22 qarasha kúni saǵat 9:30 shamasynda Semeı qalasyndaǵy Bı-Boranbaı kóshesi boıynda kele jatqan júkti áıel kenet esinen tanyp, qulap qalady.

Táýliktik kezekshilikten shyǵyp, úıine qaıtyp bara jatqan 5511 áskerı bóliminiń úsh áskerı qyzmetkeri qulap jatqan áıeldi baıqaıdy.

Ulandyqtar dereý kóligin toqtatyp, 103 shuǵyl nómirine habarlasqan.

Sosyn ýaqyt joǵaltpaı talyp jatqan áıelge alǵashqy medıtsınalyq kómek berýge kirisedi.

Zardap shegýshige esin jııýǵa kómektesip jatqanda onyń «ıdıopatııalyq epılepsııa» dıagnozymen esepte turǵany belgili bolady.

Jedel járdem kele sala áıeldi birden qalalyq perınataldy ortalyqqa alyp ketedi.

Qazirgi tańda áıeldiń densaýlyǵy birqalypty.