Ulttyq ulan sarbazdary joǵalǵan búldirshindi taýyp berdi

NUR-SULTAN. QazAqparat - Elordada QR Ulttyq Ulan sarbazdary joǵalǵan eki jasar búldirshindi tapty, dep habarlaıdy QazAqparat Ulttyq ulannyń baspasóz qyzmetine silteme jasap.

«16 mamyr kúni saǵat 12:30 shamasynda elordanyń Almaty aýdanynda qoǵamdyq tártip pen qaýipsizdikti qamtamasyz etý qyzmetin atqaryp júrgen 5573 áskerı bóliminiń jasaǵyna shuǵyl habarlama keldi. Qalalyq polıtsııa departamentiniń jedel basqarý ortalyǵy taratqan aqparatta eki jasar balanyń joǵalǵany aıtylǵan», - delingen resmı habarlamada.

Áskerı jasaq bastyǵy qatardaǵy Madııar Toqtar, patrýl sarbazdary - Jaıyq Rysqazy men Ernur Ómirbek habarlamany alyp, kórshi jasaqtarǵa habarlap, birden izdeýge kirisken.

«Іzdeý jumystary uzaqqa sozylmaı, jarty saǵatta qýanyshty habar jetti. Balanyń ata-anasy qyraǵy qyzmeti men jedel kómegi úshin Ulttyq ulan áskerı jasaǵyna alǵys bildirdi», - deıdi QR Ulttyq ulan baspasóz qyzmeti.