Ulttyq ulan sarbazdary Tarazda turǵyndarǵa pyshaq ala júgirgen buzaqyny ustady

NUR-SULTAN. QazAqparat - Ótken demalys kúnderi Tarazda Ulttyq ulan sarbazdary qalada jan-jaǵyna pyshaq siltep, jurttyń mazasyn alǵan buzaqyny ustady, dep habarlaıdy QazAqparat «Ońtústik» óńirlik qolbasshylyǵynyń baspasóz qyzmetine silteme jasap.

Oqıǵa 8 tamyzda bolǵan. Qoǵamdyq tártip pen qaýipsizdikti kúzetý boıynsha patrýlde júrgen Ulttyq ulannyń 5513 áskerı bóliminiń áskerı jasaǵy Nıetqalıev kóshesinen júrisi kúdik týdyrǵan er adamdy baıqaıdy. Tártip saqshylaryn baıqaǵan kúdikti qasha jóneldi. Áskerı jasaq boıynsha kezekshi aǵa leıtenant Sanat Halmaqan patrýldermen birge kúdiktiniń sońyna túsedi.

«Biz qala turǵynynyń áreketinen kúdiktengen soń birden soǵan qaraı bardyq. Ol bizden qashyp baryp, kósheniń qıylysyna toqtap, qaltasynan pyshaq shyǵaryp jan-jaǵyna retsiz silteı bastady. Ózine eshkimniń jaqyndamaýyn talap etip aıqaılady. Biz dereý ol azamatty qolǵa túsirý úshin áreket jasadyq, sebebi ol aınalasyna qaýip tóndirdi. Jekpe-jek urysynyń ádisterin paıdalaný arqyly biz ony ustadyq», - deıdi qatardaǵy jaýynger Mereı Ótelbaev.

Kúdiktini ustaǵan jerge Taraz qalasynyń Polıtsııa basqarmasynan jedel-tergeý toby shaqyryldy. Ustalǵan adam Taraz qalasynyń buryn sottalǵan 26 jastaǵy turǵyny ekeni anyqtaldy.