Ulttyq ulan sarbazdary Qyrǵyzstandaǵy «Kobalt-2022» oqý-jattyǵýyna qatysyp jatyr

NUR-SULTAN. QazAqparat – Qyrǵyzstan Respýblıkasynyń Balykchy qalasyndaǵy «Edelveıs» taýly oqý ortalyǵynda QR Ulttyq ulanynyń «B» arnaıy maqsattaǵy kúshteriniń qatysýymen «Kobalt-2022» taktıkalyq-arnaıy oqý-jattyǵýy ótip jatyr, dep habarlaıdy QazAqparat vedomstvonyń resmı saıtyna silteme jasap.

Jattyǵý UQShU Ujymdyq qaýipsizdik júıesiniń kúshteri men quraldaryn birlesip daıarlaý josparyna sáıkes uıymdastyryldy. Oǵan sondaı-aq, jedel den qoıý ujymdyq kúshteriniń quramyna kiretin arnaıy maqsattaǵy kúshterdiń quralymdary qatysyp jatyr.

Oqý-jattyǵý barysynda Uıymǵa múshe memleketterdiń arnaıy maqsattaǵy áskerleriniń jıyntyq toptary bandalyq qurylymdardy, terrorıstik toptardy izdeý, buǵattaý jáne beıtaraptandyrý jónindegi jattyǵýlardy jáne qoldanbaly jedel-jaýyngerlik mindetterdi oryndaıdy. Sondaı-aq, esirtki kontrabandasynyń arnalaryn jabý jáne esirtki saqtaý qoımalaryn, óndirý zerthanalaryn tabý men joıýdy júzege asyrady.

Oqý-jattyǵý jospary boıynsha arnaıy operatsııany josparlaý, ózara is-qımyldy uıymdastyrý jáne ártekti kúshter men quraldardy basqarý máseleleri boıynsha jedel den qoıý ujymdyq kúshteriniń jedel shtabymen komandalyq-shtabtyq jattyǵý kózdelgen.

Sonymen qatar, oqý-jattyǵýdyń sońynda túrli qarýdan atý boıynsha jarystar ótedi.

Foto: gov.kz