Ulttyq ulan sarbazdary Aqtóbede lańkestermen qaqtyǵysta qaza tapqandardyń rýhtaryna taǵzym etti

ALMATY. QazAqparat - Ulttyq ulannyń «Ońtústik» óńirlik qolbasshylyǵyna qarasty barlyq áskerı bólimde osydan jeti jyl buryn 5 maýsym kúni Aqtóbede lańkestermen qaqtyǵysta qaza tapqan áskerılerdiń rýhyna taǵzym etý maqsatynda «Máńgilik sapta» atty bir kúndik aktsııasy ótti, dep habarlaıdy QazAqparat tilshisi.

Ulttyq ulannyń baspasóz qyzmeti málim etkendeı, ulandyq áskerı qyzmetshiler búgin saptyq alańǵa qoıylǵan esil erlerdiń fotolary aldynda sap túzep, qaza bolǵan batyrlardyń erlikteri men qaısarlyqtaryn eske alyp bir mınýt únsizdik jarııalady.

Áskerı qyzmetshilerdiń kórsetken erligi men qaısarlyǵyna arnalǵan sharanyń sońy jeke quramnyń saptyq sherýimen aıaqtaldy.

«Qaıtys bolǵan erlerdiń qaıǵysy olardyń jaqyn týystarynyń ǵana emes, elimizdiń ortaq qaıǵysy. Olardyń tabandylyqpen kórsetken erligi eshqashan umytylmaıdy, máńgilik júregimizde saqtalady, óskeleń urpaq úshin óshpes erlik jáne Otanǵa degen adaldyqtyń úlgisi bolyp qala bermek», - delinedi habarlamada.

Eske salsaq, 2016 jylǵy 5 maýsym kúni saǵat 14.35-te lańkester toby qarý-jaraqty qolǵa túsirip, qıturqy áreketterin iske asyrý maqsatymen Aqtóbe qalasynda ornalasqan Ulttyq ulannyń 6655 áskerı bólimine shabýyl jasaǵan bolatyn.

Qarýly qaqtyǵysta lańkesterge alǵash qarsylyq kórsetken maıor Danıel Maılybaev, kishi serjant Berikjan Qalıev jáne qatardaǵy Dosbol Sapar janqııarlyq erlikpen qaza tapty.

Áskerı mindetin oryndaýda kórsetken eren erligi men qaıtpas qaısarlyǵy úshin maıor Danıel Maılybaev ІІ dárejeli «Aıbyn» ordenimen (qaıtys bolǵannan keıin), kishi serjant Berikjan Qalıev (qaıtys bolǵannan keıin) jáne qatardaǵy Dosbol Sapar (qaıtys bolǵannan keıin) ІІІ dárejeli «Aıbyn» ordenimen marapattalǵan bolatyn.