Ulttyq ulan qoıan-qoltyq urystan halyqaralyq týrnırde birinshi oryn ıelendi

    ASTANA. QazAqparat - Elordada Qazaqstan Respýblıkasy Ulttyq ulany Bas qolbasshysynyń Kýbogy úshin qoıan-qoltyq urystan ótip jatqan halyqaralyq týrnır máresine jetti. Týrnırde Qazaqstan Respýblıkasy Ulttyq ulanynyń sańlaqtary Reseı, Ózbekstan, Qytaı elderiniń sportshylaryn jeńip, jalpykomandalyq esepte birinshi oryn ıelendi, dep habarlaıdy QazAqparat tilshisi.

Aıta ketsek, atalǵan týrnırge 4 memleketten barlyǵy 19 komanda qatysqan bolatyn. Boz kilemde 150-den astam qoıan-qoltyq urysynyń sheberleri 9 túrli salmaq kórsetkishi boıynsha kúsh synasty.

Halyqaralyq týrnırge Ulttyq ulanmen birge, RF Rosgvardııasy, QHR Halyqtyq qarýlanǵan polıtsııasymen qatar, alǵash ret Ózbekstan Ulttyq gvardııasy qatysyp otyr.

Osymen 4-shi ret uıymdastyrylǵan týrnır áskerı qoldanbaly sport túrin nasıhattaı otyryp, ony odan ári damytý jáne halyqaralyq deńgeıdegi sportshylardyń sheberligin shyńdap, tájirıbe almasý, halyqaralyq baılanysty nyǵaıtý maqsatyn kózdeıdi. Sol sııaqty qoǵamdy salaýatty ómir saltyn ustaýǵa úndep, jastardy patrıottyqqa tárbıeleýmen qatar, tóreshilerdiń de kásibıligin arttyrady. Eń bastysy, Ulttyq ulannyń sporttyq komandasyn jasaqtaý jolynda kil myqtylardy anyqtaıdy.
 

Eki kúnge sozylǵan jekpe-jekte QR Ulttyq ulany jalpykomandalyq esepte birinshi oryn ıelense, ekinshi oryn - RF Rosgvardııaǵa, al úshinshi oryn - Ózbekstan Respýblıkasynyń Ulttyq gvardııasyna buıyrdy. QHR Halyqtyq qarýlanǵan polıtsııasy tórtinshi oryndy mise tutty.

«Qazaqstan Respýblıkasynyń Tuńǵysh Prezıdenti - Qarýly Kúshterdiń Joǵarǵy Bas qolbasshysy Nursultan Nazarbaev jastardyń arasynda salaýatty ómir saltyn qalyptastyrýǵa, nyǵaıtýǵa, sportpen shuǵyldanýǵa barlyq jaǵdaı jasaý kerektigin birneshe ret atap ótken bolatyn. Sportpen shuǵyldaný árqashan da memlekettiń nazarynda. Ózderińiz kórgendeı, Qazaqstanda jańa sport keshenderi, jattyǵý jáne sport ortalyqtary, mektepter ashylýda. Onyń bári jastar úshin jasalyp jatyr. Bul týrnırdi ótkizý 2012 jyldan beri dástúrge aınalǵan bolatyn. Dál osy qoıan-qoltyq urysy sekildi sport túri tózimdi ári jigerli áskerı qyzmetshilerdi shyńdap shyǵarady. Halyqaralyq týrnırdiń sátti ótýimen shyn júrekten quttyqtaımyn», - dedi jeńimpazdardy quttyqtaǵan Búkilqazaqstandyq qoıan-qoltyq urysy qaýymdastyǵynyń prezıdenti, QR Qorǵanys mınıstri Nurlan Ermekbaev.
 

Eki kúndik aıtýly týrnırde Qazaqstan qorjynyna altyn medaldi qazaqstandyq sportshylardan Saǵyn Qazybek (55 keli, 1 oryn), Baýyrjan Sultanov (60 keli, 1 oryn), Dáýirjan Saılybaev (65 keli, 2 oryn) pen Rahmetolla Satypaldıev (70 keli, 1 oryn), Danııar Zaınýllın (75 keli, 2 oryn), Rýstam Atabaev pen Jandos Asqarbekuly (ekeýi de 80 keli, 1 jáne 2 oryn), Temirjan Basaqaev pen Serik Ábirov (90 keli, 1 jáne 2 oryn) saldy.