Ulttyq ulan Konstıtýtsııa kúnin atap ótti
Saltanatty jıynǵa Ulttyq ulan Bas qolbasshylyǵynyń jeke quramy, Aýǵan jáne Uly Otan soǵysy, ásker ardagerleri qatysty.
Shara barysynda jeke quram ortalyq orkestrdiń súıemeldeýimen Memlekettik ánurandy shyrqady. Ulandyqtardy Ata Zańymyzdyń qabyldanǵanyna jıyrma bir jyl tolýymen Bas qolbasshynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov quttyqtady. «Konstıtýtsııa - qabyldanǵan kúnnen bastap, kópultty halqymyzdyń tatýlyǵy men turaqtylyǵyna tuǵyr bolyp keledi. Biz Bas qujattyń arqasynda elimizdiń irgesin bekittik, damýdyń jańa kezeńine tústik. Konstıtýtsııa elimizdiń úzdiksiz ósýine kepil bolǵan barsha zańdarymyzdyń qaınar kózi, bastaý bulaǵy. Quqyqtyq tártip áskeri Qazaqstan Respýblıkasynyń Konstıtýtsııasy júktegen talaptar men mindetterdi múltiksiz oryndap keledi. Jaýyngerlerimizdiń Táýelsizdik týyn odan ári de bıik ustaıtynyna senim mol»,- dedi áskerdiń bas tárbıeshisi.
Qyzmettik mindetterin adal atqaryp, úzdik jetistikterge qol jetkizgen áskerı qyzmetshiler Іshki ister mınıstriniń jáne Ulttyq ulan Bas qolbasshysynyń buıryǵymen marapattalyp, syı-qurmetke bólendi.
Al Otan, birlik, patrıotızm, el qorǵaý, beıbitshilik taqyrybynda ázirlengen Ulttyq ulan Án-bı ansambliniń kontserttik baǵdarlamasy merekelik kóńil-kúıge shyraı qosty.
Qazaqstan Respýblıkasy Ulttyq ulanynyń memlekettiń qaýipsizdigi jolynda, Ata Zańymyzdan tarmaqtalǵan zań qaǵıdattarynyń saqtalyp, azamattardyń bostandyǵy men quqyqtaryn qylmystyq jáne quqyqqa qarsy áreketterden qorǵaýda sińirip otyrǵan úlesi ólsheýsiz, dep habarlaıdy Ulttyq ulannyń baspasóz qyzmeti.