Ulttyq ulan chempıonatynda shtattyq qarýdan atýdyń úzdikteri anyqtaldy

NUR-SULTAN. QazAqparat – 17-19 tamyz aralyǵynda Qaraǵandy oblysynyń Qarabas kentinde shtattyq qarýdan atý jáne jeńil atletıkadan chempıonat ótti, dep habarlaıdy QazAqparat Ulttyq ulan akademııasynyń baspasóz qyzmetine silteme jasap.

Atalǵan chempıonatqa «Ortalyq», «Shyǵys», «Batys», «Ońtústik» óńirlik qolbasshylyǵynyń, sondaı-aq Ulttyq ulan akademııasynyń jáne 5573 áskerı bóliminiń áskerı qyzmetshileri qatysty. Elimizdiń barlyq óńirinen 42 sportshy jınaldy.

Jarys barysynda áskerı qyzmetshiler joǵary dene daıarlyǵy men jeńiske degen erik-jigerin kórsetti.

Shtattyq qarýdan atý jarysynyń qorytyndysy boıynsha Ulttyq ulan akademııasynyń qurama komandasy 1-orynǵa ıe boldy.

Akademııanyń áskerı qyzmetshileri jeke birinshilikte de joǵary nátıjeler kórsetti. Birinshi orynǵa ıe bolǵandar: áıelder arasyndaǵy AK-1 jattyǵýynda starshına Janna Makına – Ulttyq ulan akademııasynyń oqý bólimi aqparattyq qamtamasyz etý qyzmetiniń aǵa mamany (jaýapty oryndaýshysy); AK-2 jáne AK-3 jattyǵýynda aǵa serjant Arman Káribaı – oqý protsesin qamtamasyz etý batalony RHB qorǵaý bólimshesi bólimshesiniń bastyǵy (mashına komandıri); áskerılendirilgen krossta 3 shaqyrymǵa qatardaǵy jaýynger Erdáýlet Janǵalı – Ulttyq ulan akademııasynyń 4 kýrs kýrsanty.

Komandalyq esepte «áskerı narıad quramyndaǵy atys» jattyǵýynda akademııa komandasy da 1-orynǵa ıe boldy.

19 tamyzda 6505 áskerı bóliminiń saptyq alańynda marapattaý rásimi ótti, oǵan Ulttyq ulan Bas qolbasshysynyń orynbasary. general-maıor Baýyrjan Ábjanov jáne erlikpen qaza tapqan qatardaǵy jaýynger Madııar Qaısarovtyń ákesi Orazaly Qaısaruly qatysty.

Jarystyń jeńimpazdary men júldegerleri kýboktarmen, medaldarmen jáne baǵaly syılyqtarmen marapattaldy.

Foto : gov.kz