Ulttyq ulan áskerı bólim komandırleriniń jaýyngerlik sheberligi synaldy
QR UU «Shyǵys» óńirlik qolbasshylyǵy baspasóz qyzmetiniń málimetine súıensek, Óskemende áskerı bólim komandırleriniń oqý-ádistemelik jıyny ótti.
3 kúndik jıynǵa elimizdiń barlyq óńirlerinen 30-ǵa jýyq áskerı bólim men brıgada komandırleri qatysty.
Aldyńǵy sheptegi ofıtserler kásibı biliktiligin shyńdap, teorııalyq jáne tájirıbelik synaqtardan ótken.
«Kásibı-laýazymdyq daıyndyq sheńberinde uıymdastyrylǵan áskerı bólim komandırleriniń oqý-ádistemelik jıyny - biz úshin taptyrmas tájirıbe. Arnaıy jasaqtyń jetekshiligimen oq atýdyń jańa tásilderin úırenip, ózimizdiń jeke qurammen ary qaraı urystyq jattyǵýlarda qoldanysqa engizetin bolamyz», - dedi Aqtaý qalasynan kelgen «Batys» óńirlik qolbasshylyǵyna qarasty 6656 áskerı bóliminiń komandıri Marat Rahpanov.
Shyǵys, Batys, Ońtústik jáne Ortalyq óńirlik qolbasshylyqtarynan kelgen áskerı bólim komandırleri jaýyngerlik daıyndyqtyń negizgi túrlerinen synǵa tústi.
Túngi jáne kúndizgi jaǵdaıda avtomat pen tapanshadan nysanaǵa atýdan mergendikterin kórsetip, 3 shaqyrym qashyqtyqqa júgirip, týrnıkke tartylýdan jáne qoıan-qoltyq urystan ár ofıtserdiń dene daıyndyǵyna baǵa berildi.
«Bul jıyn biz úshin óte mańyzdy. Sebebi áskerı bólim basshylarynyń is júzindegi jaýyngerlik daıyndyqtary synalyp, lezde sheshim qabyldap, shuǵyl áreket ete bilý boıynsha bilimimiz ben biliktiligimiz shyńdalyp jatyr», - dedi Qaraǵandy qalasynan kelgen «Ortalyq» óńirlik qolbasshylyǵyna qarasty 6505 brıgadasynyń komandıri Hamıt Qazenov.