Ulttyq ulan akademııasyn jas ofıtserlerdiń 23-shi legi aıaqtady
Bıyl oqý ornyn 186 túlek bitirdi. Onyń ishinde segiz jas leıtenant úzdik nátıjemen aıaqtady. Qazaqstandyq túlektermen birge Tájikstan Respýblıkasynyń on ókili dıplom aldy.
Aıta keteıik, joǵary oqý ornyn úzdik bitirgen tórt túlek Memlekettik rámizder kúni leıtenanttyq pogondardy merziminen buryn alǵan bolatyn. Іshki ister mınıstri men óńir ákiminiń qolynan kópten kútken erekshe úlgidegi dıplomdardy birinshi bolyp oqý ornyn úzdik bitirgen túlekter aldy.
Quqyq qorǵaý vedomstvosynyń basshysy túlekterdiń akademııa qabyrǵasynda alǵan tereń teorııalyq bilimi, muqııat kásibı daıyndyǵy jáne moraldyq-psıhologııalyq shynyǵýy olardyń odan ári damýyna berik negiz bolatynyna senim bildirdi.
«Otandyq áskerı akademııalar men ınstıtýttar halyqaralyq standarttarǵa saı bolýy úshin Memleket basshysy III Búkilarmııalyq keńeste birqatar mindetter qoıǵan bolatyn. Sondyqtan akademııanyń álemdik standarttarǵa tolyq sáıkes kelýi úshin kóp nárse isteý kerek.
Osy rette memlekettiń qamqorlyǵynyń arqasynda bilim ordasy aýmaǵynda zamanaýı oqý korpýsynyń, kazarmanyń jáne sport kesheniniń qurylysy, sondaı-aq ǵımarattarǵa kúrdeli jóndeý jumystary júrgizilip jatyr. Sonymen qatar Almaty, Shymkent jáne Óskemen qalalaryndaǵy oqý ortalyqtarynyń bazasynda akademııanyń fılıaldary quryldy, – dedi Marat Ahmetjanov.
Soltústik Qazaqstan oblysy basshylyǵynyń atynan túlekterdi oqý ornyn sátti aıaqtaýymen oblys ákimi Aıdarbek Saparov ta quttyqtady.
«Aǵa býynnyń batyldyǵy men erliginen úlgi alý – sizderdiń mindetterińiz. Ol úshin naǵyz komandır jáne tálimger bolý kerek. Prıntsıp pen tabandylyqqa súıenip qyzmet etińizder. Kez kelgen syn-tegeýrinderge qarsy turyp, ulttyq múddelerimizdi qorǵaýlaryńyz qajet, – dedi ol.
Tájikstan Respýblıkasy ІІM Іshki áskerleriniń qolbasshysy Sýhrob Orzý Raýfzoda QR ІІM jáne Ulttyq ulan basshylyǵyna jyly qabyldaýy úshin jáne elimizge jumys saparymen kelýge múmkindik jasaǵanyna erekshe rızashylyǵyn bildirdi.
«Jyldan-jylǵa bizdiń respýblıkalar arasyndaǵy áskerı yntymaqtastyq dıplomatııalyq baılanystardyń mańyzdy salalarynyń biri retinde damyp keledi. Memleketaralyq kelisimderge sáıkes bizdiń kýrsanttar QR Ulttyq ulany akademııasynda oqıdy jáne 10 jyldan beri jyl saıyn Tájikstan Respýblıkasy Іshki áskerleriniń qataryn tolyqtyrady. Búginde QR Ulttyq ulanynyń oqý ornyn bitirgen joǵary bilikti 89 ofıtser Tájikstan Respýblıkasy Іshki áskerleriniń bólimshelerinde abyroımen qyzmet etip júr, – dedi Sýhrob Orzý Raýfzoda.
Túlekterdiń atynan leıtenant Áýlet Sembek sóz sóıledi. Ol akademııanyń qolbasshylyǵy men professor-oqytýshylar quramyna bergen bilimi úshin alǵysyn jetkizip, ofıtserdiń ar-namysyn joǵaltpaıtynyna jáne komandırlerdiń úmitin aqtaıtynyna sendirdi. Sodan keıin armııa dástúri boıynsha oqý ornynyń jaýyngerlik týymen qoshtasý rásimi ótti.
Bıyl akademııanyń jaýyngerlik týymen qoshtasýdyń qurmetti quqyǵyna barlyq túlek atynan oqý ornyn úzdik bitirgen leıtenant Sanjar Shymkentbaı ıe boldy. Saltanatty rásim Ulttyq ulan men akademııanyń jıyntyq orkestri daıyndaǵan kontserttik baǵdarlamamen, elordalyq brıgadanyń qurmetti qaraýyl rotasy áskerı qyzmetshileriniń defılesin kórsetýmen jalǵasty.
26 jyl ishinde oqý orny tórt myń jas ofıtserdi daıyndaǵan. Olar Ulttyq ulan ofıtserler quramynyń qataryn tolyqtyrdy. Onyń ishinde 400-den astam túlek Qarýly Kúshterge, UQK Shekara qyzmetine, Memlekettik kúzet qyzmetine, Tótenshe jaǵdaılar mınıstrligine jáne ІІM arnaýly bólimshelerine odan ári áskerı qyzmet etýge jiberildi. Kóptegen túlek quramalar men áskerı bólimderdi basqarady.
Al olardyń keıbireýleri Bas qolbasshylyqta jáne áskerdiń óńirlik qolbasshylyqtarynyń shtabtarynda basshylyq laýazymdarda qyzmet etedi.