Ulttyq tarıh ǵylymyn jańǵyrtý birneshe baǵytta júrgizilip jatyr - B. Aıaǵan

ASTANA. 1 qazan. QazAqparat - Qazaqstannyń ulttyq tarıhyn jańǵyrtý sharalary birneshe baǵytta júrip jatyr. Búgin Astanadaǵy «Qazmedıa ortalyǵynda» ótken baspasóz máslıhatynda Ulttyq tarıhty zerdeleý jónindegi vedomstvoaralyq komıssııasynyń múshesi, Memleket tarıhy ınstıtýtynyń dırektory Búrkitbaı Aıaǵan osylaı málimdedi.

Instıtýt basshysynyń aıtýyna qaraǵanda, ult tarıhyn jańǵyrtý jumystaryndaǵy basymdyqtar qatarynda - zertteý ádistemelerin jańǵyrtý, iri ǵylymı-zertteý ortalyqtaryn qurý sharalary bar.

«Osy baǵytta aıta keterligi, Memleket tarıhy ınstıtýtynyń ǵalymdary qazaq jáne orys mektepterinde oqytylatyn 10-synyp oqýshylaryna arnalǵan «Dúnıejúzi tarıhy» men «Qazaqstan tarıhy» oqýlyqtaryn saraptamadan ótkizdi. Oqýlyqtar jańa baǵyttar eskerile otyryp, ázirlendi. Jetekshi ǵylymı ınstıtýttardyń veb-saıttary jańartylyp, shet tilderinde de shyǵa bastady Qazaqstan tarıhy boıynsha veb-portal jańartylyp, onyń ózi az ǵana ýaqyt ishinde asa tanymaldylyqqa ıe boldy», - dedi B. Aıaǵan. Onyń aıtýynsha, osy ýaqytqa deıingi izdenister nátıjesinde ǵylymı materıaldar jınaǵy arnaıy daıyndalyp, baspaǵa berilgen.

Budan bólek, ınstıtýt basshysy Bilim jáne ǵylym mınıstrligi tarapynan da atqarylyp jatqan bastamalarǵa toqtalyp, elimizde zamanaýı zerthanalar men ortalyqtar qurǵanyn atap ótti.

Naqtyraq aıtqanda, mınıstrliktiń qoldaýymen popýlıatsııalyq genetıka ortalyǵy, artefaktilerdi arheologııalyq kezeńdeý zerthanasy, antropologııalyq zerthana, álem tarıhyn zertteý ortalyǵy, Ortalyq Azııa halyqtarynyń dástúrli mádenıetin ǵylymı-zertteý ortalyǵy qurylǵan. «Qazirgi tańda osy ortalyqtarda qazaqstandyq jáne sheteldik ǵalymdar jumysqa kirisken», - deıdi Búrkitbaı Aıaǵan.