Ulttyq tabystyń ıgiligin jurttyń bári birdeı kórip otyrǵan joq - Prezıdent

NUR-SULTAN. QazAqparat – Ulttyq tabystyń ıgiligin jurttyń bári birdeı kórip otyrǵan joq. Bul jaıynda QR Prezıdenti Qasym-Jomart Toqaev Qazaqstan halqyna Joldaýynda aıtty, dep habarlaıdy QazAqparat tilshisi.

«Biz ekonomıkamyzda qordalanǵan máselelerdi jaqsy bilemiz. Mysaly, shıkizatqa áli de táýeldimiz. Eńbek ónimdiligi tómen, ınnovatsııa jetkiliksiz. Ulttyq tabystyń ıgiligin jurttyń bári birdeı kórip otyrǵan joq. Árıne, munyń barlyǵy – kúrdeli máseleler. Biraq, ony sheshýdiń naqty joldary bar. Atap aıtsaq, bul makroekonomıkalyq turaqtylyqty qamtamasyz etý, ekonomıkany ártaraptandyrý jáne tsıfrlandyrý, sonymen qatar shaǵyn jáne orta bıznes pen adam kapıtalyn damytý, zań ústemdigin ornyqtyrý. Sondyqtan tyń tásilder qajet ekendigi sózsiz», - dep atap ótti Memleket basshysy.