Ulttyq saıabaqtardan 1 myń tonnaǵa jýyq qoqys shyǵarylǵan

NUR-SULTAN. QazAqparat –Ulttyq tabıǵı saıabaqtardyń aýmaǵynda demalýshylar 1000 tonnaǵa jýyq qoqys qaldyrǵan. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵanbaev Ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

Mamannyń málimeti boıynsha, memlekettik tabıǵı ulttyq parkterdegi eń úlken problema – qoqys qaldyqtarymen kúres.

«Búgingi kúnge deıin 1863 reıdtik shara ótkizilip, qorytyndysy boıynsha 118 quqyq buzýshylyq anyqtaldy. Osy kezge deıin ulttyq parkter aýmaǵynan jalpy salmaǵy 977,8 tonna qoqys shyǵaryldy. Ulttyq parkterdiń qyzmetkerleri tazalyq saqtaý sharalaryna baǵyttalǵan túsindirý jumystaryn úzdiksiz júrgizip keledi. Osy máselege qatysty Ákimshilik kodekste kózdelgen jaza túriniń qatańdatylýy bul máseleni sheshýge kómektesedi degen úimt bar», - dedi Danııar Turǵanbaev.

Sondaı-aq, ol brıfıng barysynda tabıǵı saıabaqtardy lastaǵany úshin qoldanylatyn jaza kúsheıtiletinin atady.

«Prezıdenttiń 2021 jyldyń 1 qyrkúıegindegi joldaýynda Qazaqstannyń tabıǵı baılyqtaryn qorǵaý sonyń ishinde ulttyq tabıǵı parkterdi qorǵaý máselesin zańmen retteý tapsyrylǵan bolatyn. Berilgen tapsyrmany oryndaý maqsatynda mınıstrlik osy zań jobasyn ázirledi», - deıdi vedomstvo ókili.

Onyń aıtýynsha, Qylmystyq kodekske engizilgen ózgerister endi zańsyz aǵash kesý, aǵashtardy joıý, zııan keltirý, erekshe qorǵalatyn aımaqtardy lastaý, orman alqabyn búldirý máselelerine qatysty qylmystyq jazany kúsheıtý kózdeıdi.

«Budan bólek orman sharýashylyǵy týraly zańdy, erekshe qorǵalatyn aımaqtarǵa qatysty zańdy buzǵany úshin laýazymdy tulǵalarǵa, jeke jáne zańdy tulǵalarǵa ákimshilik jazany kúsheıtý máselesi qarastyrylyp jatyr»,- dedi komıtet tóraǵasynyń orynbasary.