«Ulttyq sanaqtan keıingi etnıkalyq kelbetimiz qandaı?» - respýblıkalyq basylymdarǵa sholý
***
Keshe Beıbitshilik jáne kelisim saraıynda Túrki tildes memleketter Parlamenttik Assambleıasynyń ekinshi plenarlyq jalpy otyrysy ótti. Atalǵan alqaly jıyn arqaý bolǵan maqala el gazeti «Egemen Qazaqstanda» «Ortaq qundylyqtardy qaıta jańǵyrtatyn kez keldi» degen taqyryppen berilgen. Basylymnyń atap ótýinshe, Elbasy N.Nazarbaev Túrk PA ІІ plenarlyq otyrysyna qatysýshylarǵa quttyqtaý joldaǵan. Onda: «Túrki álemi - bizdiń mádenı muralarymyzdy etene baılanystyratyn altyn arqaý. Túp tamyrymyz bir, tarıhymyz, dinimiz, tilimiz jáne mádenıetimiz ortaq. Bizder osy ıgilikterimiz ben qundylyqtarymyzdy jasampazdyq jolyna paıdalanýymyz qajet», - delingen.
«Aqordada Astana qalasynda ótetin Shanhaı yntymaqtastyq uıymyna (ShYU) múshe memleketter Qaýipsizdik keńesteri hatshylarynyń 6-shy kezdesýi aıasynda Prezıdenttiń kómekshisi - Qaýipsizdik Keńesiniń hatshysy Marat Tájın Qytaı Halyq Respýblıkasy Memlekettik keńesiniń múshesi - Qoǵamdyq qaýipsizdik mınıstri Men Tszıanchjýmen kezdesti», - dep jazady «Egemen Qazaqstan» gazeti. Basylymnyń atap ótýinshe, taraptar óńirlik qaýipsizdiktiń ózekti máseleleri jóninde de pikir almasyp, ortaq múddeni kózdeıtin baǵyttar boıynsha eki jáne kópjaqty is-qımyldy tereńdetýge nıet bildirdi.
***
Keshe Almaty qalasynda «Naýqastardy jalǵan farmatsevtıkalyq ónimderden saqtandyrý» taqyrybynda eki kúndik oqytý semınar-trenıngi óz jumysyn bastady. Osy jaıt arqaý bolǵan maqala «Aıqyn» gazetinde «Kóshirme dáriler kóbeıip ketti» degen taqyryppen berildi. «Túsingenimiz, el shekarasynan enip jatqan kóshirme dárilerdiń úlesi kóbeıip bara jatyr eken. Desek te, naqty esebi joq. Onyń bolmaıtynynyń óz jóni bar. Óıtkeni jalǵan dári-dármektiń jasyryn tsehtarda jasalatynynan bólek, olardy elge tasymaldaý da kontrabandalyq jolmen júzege asyrylady eken», - dep jazady basylym.
«Aıqyn» basylymnyń jazýynsha, Oral qalasynda dzıýdo kúresinen el chempıonaty aıaqtaldy. Qazaqstan Spartakıadasy aıasynda ótken bul jarys úsh kúnge sozylyp, barlyq oblystar jáne Astana men Almaty qalasynan kelgen balýandar baq synady. Ár salmaq dárejesindegi beldesýlerdiń óte shıelenisti ótkeni sonshalyq, ulttyq qurama bapkerleri men maıtalman mamandar, sport keshenine jınalǵan kórermender jarysty basynan aıaǵyna deıin tapjylmaı tamashalady. Dúbirli doda jaıynda mol aqparat alǵyńyz kelse, «Jaıyq jaǵalaýyndaǵy jarys el chempıondaryn anyqtady» degen taqyrypqa nazar aýdaryńyz.
***
«Alash aınasy» gazetiniń juma kúngi nómirinde jaryq kórgen «Ulttyq sanaqtan keıingi etnıkalyq kelbetimiz qandaı?» degen maqalada memlekettiń aldaǵy ýaqytqa jasaıtyn josparlary men júrgizetin saıasatyn aıqyndaý úshin qajetti naýqan bolyp sanalatyn halyq sanaǵy jaıynda keńinen jazylǵan. «2020 jylǵa deıin ulttyq deńgeıdegi san salany qamtıtyn baǵdarlamalardy júzege asyrýda halyq sanaǵynyń málimetteriniń salmaǵy myǵym. Jáne sııasy keppegen málimetter «Qazaqstan 140 ulttan turady» degen jattandy sózdiń endigi kezekte mańyzdy emestigin dáleldedi. Halyqtar dostyǵy asyra silteýshilikpen, kópe-kórineý derektermen emes, shynaıy zertteýlermen ólshengeni durys», - dep jazady basylym.
Osy basylymnyń turaqty «Dat!» aıdarynda Májilis depýtaty Rozaqul Halmuratovpen aradaǵy suhbat «2015 jyldan bastap memlekettik qyzmetke memlekettik tildi biletinder ǵana qabyldanady degen naqty mejeni zań júzinde bekitýimiz kerek» degen taqyryppen berilgen. Basylym tilshisiniń barlyq saýaldaryna tuşymdy jaýap bergen halyq qalaýlysy taqyrypqa tuzdyq bolǵan jaıtty aıta kele: «Oǵan deıin áli tórt jyl bar. Osy ýaqyt ishinde qazaq tilin úırenbegen adamnyń ómiriniń sońyna deıin úırenbesi anyq. Úırengisi kelmese, memlekettik qyzmetke kelmeı-aq qoısyn», - deıdi.
***
«Qazaqstan temir joly» Ulttyq kompanııasy Uly Jeńistiń 66 jyldyǵyna oraı 1-30 mamyrdyń aralyǵynda Uly Otan soǵysy ardagerleri men múgedekterine jolaýshylar poıyzdarynda tegin júrý aktsııasyn uıymdastyryp otyr», - dep jazady «Kazahstanskaıa pravda» gazeti. Basylymnyń atap ótýinshe, soǵys ardagerleri men múgedekteri bir aı boıy Qazaqstan Respýblıkasy men TMD elderi aýmaǵynda tegin júre alady. Táýelsiz Memleketter Dostastyǵy elderine shyqqan saparlarynda olar barý-qaıtý bıletterin birge resimdeýi tıis.