Ulttyq parkterde 685 shaqyrymdyq týrıstik marshrýt jasaldy

NUR-SULTAN. QazAqparat – Almaty oblysy aýmaǵyndaǵy ulttyq parkterde ınjenerlik ınfraqurylymdy damytýǵa arnalǵan jol kartasy ázirlenip, bekitildi. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti erekshe qorǵalatyn tabıǵı aýmaqtar basqarmasynyń jetekshisi Erqulan Dúısekeev málim etti, dep habarlaıdy QazAqparat tilshisi.

«Bizdiń mınıstrlik Indýstrııa jáne ınfraqurylymdyq damý mınıstrligimen jáne Almaty oblysynyń ákimdigimen birlesip atalǵan oblys aýmaǵyndaǵy ulttyq parkterde ınjenerlik ınfraqurylymdy damytýǵa arnalǵan jol kartasyn ázirlep, bekitti. Búginde jol kartasy aıasynda ulttyq parkter aýmaǵynda 685 shaqyrymdy quraıtyn týrıstik marshrýt jasaldy. 12 shaqyrym jolǵa jóndeý júrdi», - dedi Erqulan Dúısekeev elordada ótken «Ulttyq parkter: ekologııalyq týrızmniń jańa modeli» atty dóńgelek ústel otyrysy barysynda.

Onyń aıtýynsha, ulttyq parkterde týrızmdi damytý baǵytyndaǵy jumys jalǵasyn tabady.

«Qazirgi ýaqytta «Altynemel» ulttyq parkiniń tekserý beketinde kelýshiler úshin ınternet tartyldy. Sonymen qatar barlyq ulttyq parkterge bıletti onlaın satyp alý múmkindigi paıda boldy. Bıletti kaspi.kz qosymshasy arqyly alýǵa bolady. Odan bólek, qatty turmystyq qaldyqtardy bólek jınaýdy engizý boıynsha jumys qolǵa alyndy», - deıdi ol.

Buǵan deıin mınıstrlik ókili Sharyn memlekettik ulttyq tabıǵı parki aýmaǵynda týrızmdi damytý maqsatynda 4,5 mlrd teńge ınvestıtsııa tartylǵanyn aıtty. Spıkerdiń málimetine sáıkes park aýmaǵynda sapar ortalyǵyn, 2 glempıng, eko qonaqúıler, qyzmetkerlerge arnalǵan jataqhana, karavanıng, qazaq aýylyn, balalarǵa arnalǵan alańdar salý josparlanyp otyr.