Ulttyq park aýmaǵyn lastaǵan kásipkerler jerinen aıyrylady

NUR-SULTAN. QazAqparat –Ulttyq tabıǵı saıabaq aýmaǵynan jer alyp, kásipkerlikpen aınalysqan tulǵalar ıeligindegi ýchaskeni lastasa, jerinen aıyrylady. QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵanbaev Ortalyq kommýnıkatsııalar qyzmetinde ótken brıfıngide osyndaı málimet berdi, dep habarlaıdy QazAqparat tilshisi.

«Biz usynyp otyrǵan zań jobasynda Ákimshilik kodeske jańa bap qosý usynylǵan. Bul bap memlekettik ulttyq tabıǵı saıabaqtarda týrıstik-rekreatsııalyq qyzmet kórsetý tártibin buzǵany úshin shara qabyldaýdy kózdeıdi. Buǵan deıin ondaı bap bolmaǵan. Sondyqtan, eshkim mundaı jazaǵa tartylmaǵan. Endi orta kásipkerlik sýbektileri mundaı zańsyzdyq úshin 30 AEK (87 510 teńge – red.), al iri kásipkerlik sýbektileri 100 AEK (291 700 teńge – red.) aıyppul tóleıdi», - degen vedomstvo ókili tabıǵatqa janashyrlyq tanytpaǵan kásipkerler ıeligindegi jerden aıyrylatynyn da eskertti.

«Ulttyq saıabaq aýmaǵynan jer telimin alyp qoldanýshylar kelisimshart mindettemelerin buzyp, aýmaqty turmystyq qaldyqpen lastaǵan jaǵdaıda olarmen jasalǵan kelisimniń kúshi joıylady. Munyń bári jer telimin paıdalanýshymen jasalǵan kelisimshartta aıqyn jazylǵan», - dedi Danııar Turǵanbaev.