Ulttyq panteonǵa jerlenetinder ustanǵan dinine qaraı bólinbeıdi

ASTANA. QazAqparat – Búgin Astana qalalyq máslıhatynda panteonǵa kórnekti tulǵalardy dinine qaraı jeke jerleýdiń oryndylyǵy máselesi kóterildi, dep habarlaıdy QazAqparat tilshisi.

Qoǵamdyq keńeste depýtattar quzyrly organ ókilderine elimizge eńbegi sińgen tulǵalardy panteonǵa jerleý úshin dinine baılanysty ýchaskelerge bólý qanshalyqty oryndy ekenin surady.

Buǵan qatysty Astana qalasynyń otyn-energetıka kesheni jáne kommýnaldyq sharýashylyq basqarmasynyń basshysy Marsel Uzaqov jaýap berdi.

«Biz tek tapsyrys berýshimiz, adamdardy jerlemeımiz. Panteon - bul Qazaqstannyń kórnekti qaıratkerleri jerlenetin qarapaıym zırat emes. Sondyqtan onda jerlenetin tulǵalardy dinine baılanysty bólýge bolmaıdy dep sheshim qabyldandy. Bizdiń elimiz zaıyrly memleket», - dedi M.Uzaqov.

Eske salsaq, taıaýda Úkimet qaýlysynyń jobasy kópshilik talqylaýǵa shyǵaryldy. Jańa erejege saı, endi ulttyq panteonǵa el prezıdentteriniń otbasy músheleri jerlenbeıdi. Degenmen memleket basshylarynyń jubaıy men zaıybyn atalǵan orynǵa jerleýge ruqsat etiledi.