Ulttyq Olımpıadalyq komıtet stýdentter sportyn damytýǵa nıetti

ASTANA. QazAqparat - Búgin Qazaqstan Respýblıkasy Ulttyq  Olımpıadalyq komıteti men L.Gýmılev atyndaǵy Evrazııa Ulttyq ýnıversıteti ózara yntymaqtastyq jónindegi memorandýmǵa qol qoıdy, dep habarlaıdy QazAqparat tilshisi.

Osy kelisim aıasynda Olımpıadalyq qozǵalys pen salaýatty ómir saltyn damytýǵa baǵyttalǵan ózara is-sharalardy ótkizý, jastardy oqýǵa, rýhanı jáne mádenı qundylyqtarǵa baýlý týraly kelisildi.

QR UOK Bas hatshysy Danııar Abýlgazın memorandýmǵa qol qoıý saltanatynda Ulttyq Olımpıadalyq komıtet sportty jan-jaqty damytý men nasıhattaý barysynda jetekshi bilim jáne mádenıet uıymdary men yntymaqtastyq ornatý kózdeletinin aıta ketti.

«Búginde Tımýr Qulybaevtyń basshylyǵymen Ulttyq Olımpıadalyq komıtet Olımpıadalyq sportty damytý da jańa ádisterdi qoldanýda. Qazirdiń ózinde biz Qazaqstannyń sporttyq ındýstrııasynyń odan da tıimdi jumys jasaýy úshin júıeli negizin qaladyq. QR UOK prezıdenti joǵary jetistikter sportynyń negizi bolatyn buqaralyq jáne stýdentter sportyna asa kóńil bólýde. Qazirgi tańda olımpıadalyq qozǵalysty jáne elimizdiń stýdentter sportyn damytý maqsatynda Qazaqstannyń iri oqý oryndary men yntymaqtastyq jónindegi memorandým da ázirlenip jatyr. Jetekshi sportshylarymyz bilim alyp jatqan elimizdegi eń úzdik oqý ordalarynyń birimen yntymaqtastyqty bastap jatqanymyzǵa qýanyshtymyz»,  - dedi D.Abýlgazın.

Búgin  dál osy jerde ýnıversıtet stýdentteriniń Danııar Eleýsinov, Vasılıı Levıt, Gýzel Manıýrova sııaqty beldi olımpıadashylarmen kezdesýi de ótti. Sonymen qatar, EUÝ stýdentteri, sınhrondy júzýden Azııa oıyndarynyń eki dúrkin qola júldegerleri Ekaterına jáne Aleksandra Nemıchterdi marapattaý rásimi boldy.