Ulttyq olımpıada komıtetteri Tokıo Olımpıadasyna daıyndyq kezdesýlerin bastady
QR UOK-niń baspasóz qyzmeti taratqan málimetterge súıensek, Tokıoda 2020-shy jyly ótetin Olımpıada oıyndaryna Ulttyq olımpıada komıtetteriniń qatysýymen ótetin bes daıyndyq kezdesýdiń úshinshi otyrysy ótip jatyr.
Kezdesý barysynda Tokıo-2020 oıyndaryna daıyndyq pen jospar qarastyrylýda. Atalǵan kezdesýge Qazaqstan atynan haqyqaralyq qatynastar departamentiniń basshysy Álimjan Aqaev qatysýda.
Tokıodaǵy XXII jazǵy Olımpıada oıyndarynyń baǵdarlamasyna 33 sport túri endi. Arasynda jańadan qosylǵan beısbol, karate, serfıng, quzǵa shyǵý jáne skeıtbordıng syndy sport túrleri bar. Tokıo Olımpıadasynyń uıymdastyrý komıtetiniń jospary boıynsha tórt jylda bir ótetin dúbirli dodaǵa 11 090 sportshy qatysady dep kútilýde. Jarysqa qatysýshy sportshylardyń 48,5 paıyzyn áıelder quraıdy dep josparlanýda.
Aıta keteıik, 2020 jylǵy Olımpıada oıyndaryna birneshe sport túrlerinen qosymsha saıystar engizildi. Olar: jeńil atletıkadan 4h100 metr qashyqtyqta saıys, dzıýdodan komandalyq saıys, sadaqpen atý jáne trıatlonnan aralas komandalyq saıys, basketboldan 3h3 saıysy (erler, áıelder), ústel tennısinen aralas juptyq saıys, semserlesýden komandalyq saıys, júzýde 800 metr (erler) jáne 1500 metr (áıelder) qashyqtyqtaǵy saıys, velosportta «medıson» (erler, áıelder) saıysy.
Naýryzdyń 27-si men 28-inde UOK ókilderiniń qatysýymen 2020 jylǵy Olımpıada oıyndarynyń nysandary kórsetiledi. Uıymdastyrý komıtetiniń málimdeýinshe, kóptegen sport keshender keler jyldyń jazynda iske qosylady.