Ulttyq mýzeıde sırek kezdesetin qoljazbalar kórmege qoıyldy
«Búgin tól tarıhymyzdy nasıhattaý jolynda asa mańyzdy shara ótip otyr. Kóne jazba muralar tamyry tereń tarıhymyzdy aıshyqtap, kópshilikke dáripteıdi. Ult rýhanııatyn odan ári nyǵaıtyp jas urpaqqa jol ashady. Osy rette biz ulttyq mýzeıde qoljazbalar jáne sırek kitaptar ulttyq ortalyǵyndaǵy biregeı jazba derekterden arnaıy kórme uıymdastyryp otyrmyz. Maqsat – tarıhı muralardy keleshekpen ózara baılanystyrý, elimizdiń sanǵasyrlyq tarıhyn aıqyndaıtyn baǵa jetpes muralarymyzdy tanytý. Sonymen qatar ony ǵylymı aınalymǵa qosýymyz kerek. Kórmede el tarıhyna qatysty birneshe mańyzdy jazba qoıylǵan. Atap aıtsaq, VII ǵasyrda jazylǵan Quran men Qoja Ahmet ıAssaýıdiń, Mahmýdıdyń, Ibn Halıfa jáne basqa tanymal tulǵalardyń shyǵarmalary bar», - dedi QR Mádenıet jáne sport mınıstri Dáýren Abaev kórmeniń ashylý saltanatynda.
Mınıstrdiń aıtýynsha, atalǵan qundy qoljazbalar - ultymyzdyń álemdik órkenıettiń damýyna qosqan úlesi.
Sondaı-aq, olar jahandyq tarıhta Uly dalanyń ornyn anyqtaýda mańyzdy ról atqarady.
«Aldymen osyndaı aýqymdy, mańyzdy sharanyń bizdiń mýzeıde ótip jatqany qýantady. Týǵan jerimizden kóptegen qundy jádigerlerdiń tabylǵany aıan. Tarıhtan belgili, Altyn adamdy ashqan kezde qasynan altyn tostaǵan tabyldy. Sol tostaǵan syrtyndaǵy jazý - kóne túrki jazbasynyń kýási. Sonymen qatar kúlli túrki álemine tanymal Kúltegin eskertkishin de bárińiz bilesizder», - deıdi QR Ulttyq mýzeıiniń dırektory Arystanbek Muhamedıuly.
Uly dala tarıhynyń jazba muralary» atty kórmege Qaıyp hannyń túrik sultany ІІ Ahmedke jazǵan hatynan úzindi, sultan Kenesary, Jáńgir han, sultan Aıtóre Aıshýaq, Abylaı hannyń hattary jáne taǵy basqa qundy jádigerler qoıylǵan.
Ulttyq mýzeıde ashylǵan kórmeni elorda jurtshylyǵy jyl sońyna deıin tamashalaı alady.