Ulttyq mýzeıde mektep oqýshylaryna arnalǵan jańa joba bastaldy
Atalmysh joba mýzeı jádigerleri men kollektsııalaryn paıdalana otyryp, 5-9 synyp oqýshylarynyń qoǵamdyq-gýmanıtarlyq pánder (Qazaqstan tarıhy, Dúnıejúzi tarıhy, ólketaný jáne t.b.) boıynsha teorııalyq bilimin praktıka júzinde bekitýge baǵyttalǵan.
«Búginde óskeleń urpaqtyń keleshegin qamtamasyz etý, ult sapasyn jaqsartý – aıryqsha mańyzǵa ıe. 2022 jyl Prezıdent Qasym-Jomart Toqaevtyń Jarlyǵymen Balalar jyly dep jarııalandy. Osy rette, vedomstvo aıtýly merekege oraı orta bilim beretin mektepterdiń oqýshylary men tarıh páni muǵalimderi úshin «Mýzeıdegi mektep kúni» jańa jobasyn usynyp otyr. Jobanyń aty aıtyp turǵandaı, jas jetkinshekterimiz mekteptegi josparly sabaqtarynan bólek, san taraý tarıhqa murajaı arqyly da den qoıady. Ulttyq mýzeı ekspozıtsııasyndaǵy jádigerler oqýshylarymyz úshin taptyrmas qundy materıaldar deýge bolady. Tas dáýirinen bastap Táýelsiz Qazaqstan tarıhyna deıin syr shertetin Ulttyq mýzeıge jastarymyz basqa ýaqytta da jıi kelgeni jón», - dedi Mádenıet jáne sport mınıstri Dáýren Abaev.
Onyń aıtýynsha, aldaǵy ýaqytta ınteraktıvti dáristerdi elimizdiń basqa da óńirlerine taratý josparlanyp otyr.
Vedomstvo málimetine qaraǵanda, sabaqtar offline jáne online formatta ótedi. Jobanyń offline formaty QR Ulttyq mýzeıiniń ekspozıtsııalyq zaldarynda júredi. Interaktıvti sabaqtardy mýzeıdiń zertteýshi ǵalymdary, ekskýrsııa jetekshileri Nur-Sultan qalasy ákimdiginiń Bilim basqarmasyna qarasty orta mektepterdiń tarıh páni muǵalimderimen birigip ótkizedi. Ár sabaqtyń uzaqtyǵy 35-45 mınýt aralyǵynda bolady. Sabaq kezinde oqýshylar mýzeı ekspozıtsııalaryndaǵy eksponattardy ortaǵa alyp tanysady. Eksponattardy (kóshirmelerin) ustap kórip, jaqyn tanysýyna múmkindik jasalady. Ár beısenbi saıyn túske deıin 2 sabaq jáne tústen keıin 2 sabaq ótiledi.
Jobanyń online formaty aldyn ala túsirilgen beınesabaqtar arqyly júzege asyrylady. Beınesabaqtardyń baǵdarlamasyn mýzeı mamandary daıyndaǵan. Ár sabaqtyń uzaqtyǵy 5-7 mınýt aralyǵynda bolady. Daıyn sabaqtar mektepterdegi oqý baǵdarlamasynyń kúntizbesine sáıkes QR Ulttyq mýzeıiniń resmı saıtyna salynady. Beınesabaqtardyń qurylymy júrgizýshiniń tanystyrý sózinen, grafıkadan jáne ekspozıtsııalarǵa sholýdan turady. Online format búkil Qazaqstan oqýshylaryn qamtýǵa múmkindik beredi.
Atap aıtqanda, sabaqtardyń taqyryby men mazmuny Oqý-aǵartý mınıstrligi bekitken oqý baǵdarlamasyna sáıkes keledi.