Ulttyq muraǵat Qazaq handyǵynyń 550 jyldyǵyna oraı qujattar kórmesin uıymdastyrdy

ASTANA. QazAqparat - Qazaqstan Respýblıkasynyń Ulttyq muraǵaty Qazaq handyǵynyń 550 jyldyǵyna oraı qatarynan eki kórme uıymdastyrdy. Birinshisi - muraǵattyń qujattarynan quralǵan kórmesi, ekinshisi - sýretshi-grafık, muraǵat qyzmetkeri Raqymjan Qasymjannyń osy taqyryptaǵy «Uly dala eliniń tarıhy» atty kórmesi ashyldy.

Ulttyq muraǵat dırektory Marat Ábsemetovtiń aıtýynsha, ulttyq muraǵat kórmesine tarıhı qujattardyń kóshirmeleri qoıylǵan. «Kórmege shetel muraǵattarynda, ǵylymı mekemelerde turǵan HVI-XX ǵasyrlardaǵy biregeı muraǵattyq qujattardyń kóshirmelerin qoıyp otyrmyz. Ásirese, Qazaq handyǵy kezeńine qatysty qujattar óte qundy derek bolyp otyr», - deıdi ol.

Al, sýretshi-grafık Raqymjan Qasymjan bolsa, qazaq batyrlarynyń, jylqylar men qazaq sulýlarynyń sýretin aq-qara túste kelbettep bergen.

«Bul taqyrypta, ıaǵnı, qazaqtyń jaýgershilik zamandaǵy beınelerin, batyrlardyń kelbetterin, jaýyngerdiń saýyt-saımandaryn aq-qara túste burynnan salyp júrgen edim. Mine, Qazaq handyǵynyń 550 jyldyǵy aıasynda kórme ótkizýdiń oraıy kelip, 28 sýretimdi halyq nazaryna usynaıyn dep sheshtim. Aıtaıyn degenim, men osy sýretterdi salarda, mýzeılerge baryp, qol óner sheberlerine baryp, qylyshtyń qandaı bolatynyn, jaýyngerdiń kıimderi qandaı bolǵanyn ábden zerttep aldym. Sondyqtan, sýretterimdegi beıneler shyn beıne, shyn tarıh», - deıdi sýretshi Raqymjan Qasymjan.

Ulttyq muraǵatta ashylǵan kórme qyrkúıek aıynyń sońyna deıin jalǵasady.