Ulttyq qurama úshin barymyzdy salamyz - Aleksandr Býblık

NUR-SULTAN. QazAqparat - Qazaqstan ulttyq quramasynyń kóshbasshysy Aleksandr Býblık Devıs kýbogy toptyq kezeńi aldynda óz oı-tolǵamyn bólisti, dep habarlaıdy QazAqparat tilshisi.

Onyń aıtýynsha, Qazaqstan oınaıtyn D tobyna óte myqty komandalar túsken.

«Fınaldyq kezeńde óner kórsetetin 16 quramanyń qaı-qaısysy da osal emes. Bizdiń kúshti topqa túskenimiz, bir jaǵynan, jaqsy. Óıtkeni muqııatyraq bolamyz, namysty qoldan bermesimiz anyq. Tennıste favorıtter ádette jeńiske jetedi. Alaıda Devıs kýbogynyń óz ereksheligi bar, munda bári reıtıngke baılanysty emes. Biz ulttyq quramaǵa árdaıym jeńis úshin kelemiz. Sondyqtan Nıderland, AQSh jáne Ulybrıtanııamen ótetin matchtarda barymyzdy salamyz», dedi A.Býblık.

Qarsylas komandalar quramynda birqatar ózgerister boldy: US Open týrnıriniń jartylaı fınalısi Frensıs Tıafo AQSh-qa kómektese almaıdy.

Sondaı-aq nıderlandylyq, US Open jarysynyń juptyq syndaǵy fınalısi Ýeslı Kolhof ta qatyspaıdy.

Qazaqstan birinshi kezdesýin Nıderlandpen 13 qyrkúıek kúni ótkizedi. Match elorda ýaqytymen saǵat 21.00-de bastalady.

Eske sala keteıik, budan buryn Qazaqstan quramasynyń Devıs kýbogyna daıyndyqty bastaǵanyn, polıak tennısshisiniń alǵash ret US Open týrnıriniń jeńimpazy atanǵanyn jazǵan bolatynbyz.