Ulttyq qordyń qarajatyn únemdeý: bıýdjetke beriletin transfertter birtindep azaıady

ASTANA. QazAqparat – Ulttyq bankpen birlese otyryp, Ulttyq qordyń ınvestıtsııalyq kirisin kóterýge qatysty shara qabyldanyp jatyr. Bul týraly Parlament palatalarynyń birlesken otyrysynda Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin qarastyrý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Ulttyq qordyń qarajatyn únemdeý saıasatyn jalǵastyrý maqsatynda respýblıkalyq bıýdjetke beriletin transfertter qarajatyn birtindep azaıtý jalǵasatyn bolady. Sondaı-aq, Ulttyq bankpen birlesip, qordyń ınvestıtsııalyq kiristerin arttyrýǵa qatysty shara qabyldanyp jatyr. Bul Memleket basshysynyń Ulttyq qordyń qarajatyn 2030 jylǵa qaraı 100 mlrd dollarǵa deıin jetkizý jónindegi tapsyrmasyn oryndaýǵa múmkindik beredi», - dedi E. Jamaýbaev.

Budan bólek ol ulttyq jobalarǵa jeke toqtaldy.

«Qazirgi kezde qoldanystaǵy 10 ulttyq jobanyń is-sharalaryn Memlekettik josparlaý júıesine jáne ózge de qujattarǵa ıntegratsııalaý boıynsha jumys aıaqtalyp keledi. Naqty salalardy damytýǵa baǵyttalǵan 2029 jylǵa deıingi 15 tujyrymdama bekitildi. Olar Prezıdenttiń saılaýaldy baǵdarlamasyn iske asyrý josparymen úılestirilgen. Sondaı-aq, jańa formattaǵy «Jaıly mektep», «Aýyldaǵy densaýlyq saqtaýdy jańǵyrtý» ulttyq jobalary bekitildi.

Budan bólek, «Qoljetimdi ınternet» jobasy ázirlendi. Sóıtip, naqty problemalardy sheshýge baǵyttalǵan qysqa əri nusqa qujattar formatyna kóshý júzege asyrylyp jatyr», - dedi Qarjy mınıstri.