Ulttyq qordan kepildendirilgen transfert mólsheri ulǵaıtylmaq
10:32, 20 Sáýir 2022
NUR-SULTAN. QazAqparat – Májilis depýtattary «QR Ulttyq qorynan 2022-2024 jyldarǵa arnalǵan kepildendirilgen transfert týraly» QR Zańyna ózgeris engizý jónindegi» Zań jobasyn maquldady, dep habarlaıdy QazAqparat tilshisi.
Atalǵan zań jobasyn QR Ulttyq ekonomıka mınıstriniń mindetin atqarýshy Tımýr Jaqsylyqov tanystyrdy.
«Zań jobasymen Ulttyq qordan kepildendirilgen transfert mólsherin 4 trln 30 mlrd teńgege deıin ulǵaıtý qarastyrylýda. Jalpy qarajat Memleket basshysynyń tapsyrmalaryn iske asyrý úshin qosymsha qarjylandyrýdy qamtamasyz etý sheńberinde respýblıkalyq bıýdjettiń teńgerimdiligin qamtamasyz etýge baǵyttalatyn bolady. Jalpy ulttyq qordyń nysanaly kórsetkishteri fıskaldy shekteýler sheginde saqtalady. Qoldaýlaryńyzdy suraımyn», - dedi Tımýr Jaqsylyqov Májilistiń jalpy otyrysynda.
Nátıjesinde zań jobasyn otyrysqa qatysqan 101 depýtattyń barlyǵy maquldady.
Sonymen birge, Májiliste «2022-2024 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» Zań jobasy talqylanyp jatyr.
Buǵan deıin Májilis «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi maquldaǵan edi.