Ulttyq qordan kepildendirilgen transfert kólemi tómendeıdi
Bul týraly eldiń 2020-2024 jyldarǵa arnalǵan áleýmettik-ekonomıkalyq damý boljamyn tanystyrý kezinde QR Ulttyq ekonomıka vıtse-mınıstri Mádı Takıev málim etti, dep habarlaıdy QazAqparat tilshisi.
«Makroekonomıkalyq boljamnyń negizinde 2020-2022 jyldarǵa arnalǵan bıýdjet parametrleri men Ulttyq qordyń boljamy ázirlendi. Respýblıkalyq bıýdjettiń kiristeri (transfertterdi qospaǵanda) 2020 jyly 8 trln teńge somasynda, 2021 jyly – 8,6 trln teńge, 2022 jyly – 9,4 trln teńge somasynda boljanady», - dep toqtaldy M. Takıev Parlament Májilisinde.
Onyń sózine qaraǵanda, Ulttyq qordy qalyptastyrý jáne paıdalaný tujyrymdamasyna sáıkes, respýblıkalyq bıýdjetke kepildendirilgen transfertti 2020-2021 jyldary 2,7 trln teńge mólsherinde, al 2022 jyly 2,6 trln teńgege deıin tómendetýmen aıqyndaldy.
«Osyny eskere otyryp, «Qazaqstan Respýblıkasynyń Ulttyq qorynan 2020-2022 jyldarǵa arnalǵan kepildendirilgen transfert týraly» zań jobasy ázirlendi. Ulttyq qordy josparly paıdalaný Ulttyq qordaǵy qarajattyń tómendetilmeıtin qaldyǵy boıynsha shekteýdiń oryndalýyn (JІÓ-niń keminde 30%) qamtamasyz etedi», - dep túsindirdi M. Takıev.
Vıtse-mınıstrdiń aıtýynsha, bıýdjet tapshylyǵy 2020 jyly jalpy ishki ónimniń 2,1%, keıinnen 2021 jyly – 1,5% deıin jáne 2022 jyly – 1 % deıin tómendetilgen mólsherinde belgilendi.
«Osy parametrlerdi esepke ala otyryp, respýblıkalyq bıýdjettiń shyǵystary 2020 jyly 12,7 trln teńge, 2021 jyly 13,2 trln teńge, 2022 jyly – 13,6 trln teńge kóleminde belgilendi», - dedi Mádı Takıev.