Ulttyq qordan kepildendirilgen transfert kólemi aıqyndaldy
«Ulttyq qordy qalyptastyrý jáne paıdalaný tujyrymdamasyna sáıkes, respýblıkalyq bıýdjetke kepildendirilgen transfertti 2020-2021 jyldary 2 trln 700 mlrd teńge mólsherinde, al 2022 jyly 2 trln 600 mlrd teńgege deıin tómendetýmen aıqyndaldy», - dedi Ulttyq ekonomıka mınıstri Rýslan Dálenov.
2020-2022 jyldarǵa aıqyndalǵan Ulttyq qordan kepildendirilgen transferttiń mólsheri Ulttyq qordaǵy qarajatty jalpy ishki ónimniń 30 paıyzy mólsherinen tómendetpeý týraly sharttyń oryndalýyn qamtamasyz etedi.
Jalpy otyrys barysynda depýttar Ulttyq qordan kepildendirilgen transfert kólemin tómendetý úrdisi týraly surady.
«Ulttyq qordyń jınaqtalýy mańyzdy. Memleket basshysy Joldaýynda tapsyrǵandaı, Ulttyq qordan kepildendirilgen transfert kólemi tómendeıdi, tómendetý kestesi ázirlendi. 2022 jyly transfert 100 mlrd teńgege qysqartylady. 2023-2025 jyldary kezeńinde jyl saıyn 200 mlrd teńgege tómendeıdi. Al 2025 jyldan bastap Ulttyq qordan kepildendirilgen transfert kólemi 2 trln teńgege deıin qysqarady. Bul týraly Memleket basshysyna osy jyldyń 15 qazanynda Ekonomıkany damytý jónindegi keńeste baıandaldy. Bıyldyń sońyna deıin Ulttyq qor tujyrymdamasyna qajetti ózgerister engiziletin bolady», - dedi Rýslan Dálenov.