Ulttyq qordan alynatyn qarajat munaıdan túsetin qor kirisinen aspaıdy – jańa tártip

NUR-SULTAN. QazAqparat – Ulttyq qorǵa túsken tikeleı salyq túsimderiniń kólemi 1,8 esege ulǵaıdy. Bul týraly Parlament palatalarynyń birlesken otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstrdiń orynbasary–Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Esep komıteti Ulttyq qordan beriletin nysanaly transfert somasynyń ulǵaıǵanyn aıtqan bolatyn. Ásirese, qazirgi shyǵyndy óteýge erekshe nazar aýdarǵan. Degenmen, transfertterdiń ósýi áleýmettik mindettemelerdi, daǵdarysqa qarsy sharalardy, memlekettik baǵdarlamalardy qarjylandyrý jáne pandemııa jaǵdaıynda ekonomıkadaǵy iskerlik belsendilikti qoldaý qajettiligimen baılanysty boldy. Óz kezeginde, 2020 jylmen salystyrǵanda ótken jyly munaı sektorynan Ulttyq qorǵa túsken tikeleı salyq túsimderiniń kólemi 1,8 esege ulǵaıǵanyn atap ótkim keledi», - dedi E. Jamaýbaev.

Onyń aıtýynsha, bıyldan bastap kepildendirilgen transferttiń mólsherin aıqyndaýda kontrtsıkldik bıýdjet qaǵıdalary eskeriledi.

«Jańa tásilderge sáıkes Ulttyq qordan bıýdjetke alynatyn qarajat munaı sektorynan túsetin qor kiristerinen aspaıtyn bolady. Sondaı-aq bıýdjettiń shyǵystaryna da shekteý qabyldandy. Bul Qordyń jınaqtaý fýnktsııasyn kúsheıte otyryp, aktıvterdi kóbirek jınaýǵa múmkindik beredi», - dedi Úkimet basshysynyń orynbasary.

Budan buryn habarlanǵandaı, Erulan Jamaýbaev depýtattardyń bıýdjetke qatysty usynymdary Úkimet jumysynda eskeriletinin aıtty.