Ulttyq qor qarjysy halyq múddesi úshin jumys isteı bastaıdy – Erlan Qarın

ASTANA. QazAqparat – Ulttyq qordyń qarjysy halyq múddesi úshin jumys isteı bastaıdy. Memlekettik keńesshi Erlan Qarın Májilis qaraýyna túsken «Ulttyq qor – balalarǵa» baǵdarlamasyna qatysty osylaı pikir bildirdi, dep habarlaıdy QazAqparat.

«Búgin Májilis depýtattary Ulttyq qordan balalarǵa bólinetin járdemaqy máselesi jónindegi zań jobasyn qaraýǵa kiristi.

Atalǵan zań jobasy kelesi jyldyń 1 qańtarynan bastap iske asatyn Memleket basshysynyń «Ulttyq qor – balalarǵa» atty baǵdarlamasy boıynsha ázirlenip jatyr.

Bul – Prezıdent júzege asyryp jatqan aýqymdy reformalar baǵdarlamasynyń negizgi bastamalarynyń biri.

Atalǵan bastama týraly Prezıdent byltyrǵy jyldyń 1 qyrkúıek kúni jarııalaǵan Joldaýynda aıtqan bolatyn.

Memleket basshysynyń «Ulttyq qor – balalarǵa» jobasy jas qazaqstandyqtardyń kámelet jasyna tolǵan kezinde óziniń baspana jaǵdaıyn jaqsartýyna nemese bilim alýyna múmkindik beredi.

Osylaısha, Prezıdenttiń áleýmettik mańyzdy bastamasy zań turǵysynan rásimdelip, Ulttyq qordyń qarjysy halyqtyń múddesi úshin jumys isteı bastaıdy», - dep jazdy E.Qarın.

Eske salaıyq, búgin Májilis «Ulttyq qor – balalarǵa» qujatyn qaraýǵa aldy.

«Qazaqstan Respýblıkasynyń keıbir zańnamalyq aktilerine QR Ulttyq qorynan balalarǵa tólem jasaý máseleleri boıynsha ózgerister men tolyqtyrýlar engizý týraly» zań jobasy Memleket basshysynyń «Ulttyq qor – balalarǵa» jobasyn 2024 jylǵy 1 qańtardan bastap iske qosý maqsatynda ázirlendi. Ulttyq qordyń jyl saıynǵy ınvestıtsııalyq tabysynyń 50 paıyzy balalardyń arnaýly jınaqtaýshy shottarynda jınaqtalatyn bolady.