«Ulttyq qor – balalarǵa»: Jınalǵan qarajat dollarmen beriledi

ASTANA. QazAqparat – «Ulttyq qor - balalarǵa» jobasy aıasynda balalar jınaqtalǵan qarajatyn dollarmen alady. Bul týraly Májilistiń jalpy otyrysynda Qarjy vıtse-mınıstri Dáýren Temirbekov aıtty, dep habarlaıdy QazAqparat tilshisi.

Keıbir zańnamalyq aktilerge Ulttyq qordan balalarǵa tólem jasaý máseleleri boıynsha ózgerister men tolyqtyrýlar engizý týraly zań jobasyn talqylaý barysynda depýtat Erbolat Saýryqov «Ulttyq qor – balalarǵa» jobasy aıasynda jınaqtalatyn qarajattyń ınflıatsııasyna kim jaýap beretindigin suraǵan edi.

«Inflıatsııa máselesi osy zań jobasynda qarastyrylǵan, ázirlengen kezde qarastyrdyq. Eń bastysy, qarajat dollarmen jınaqtalady. Bala 18 jasqa tolǵan kezde aqshany dollarmen alady. Sondyqtan qandaı da bir ınflıatsııalyq aýyrtpalyq bolmaıdy», – dedi Qarjy vıtse-mınıstri Dáýren Temirbekov.

Ulttyq bank tóraǵasynyń orynbasary Álııa Moldabekova da Ulttyq qor qarajaty dollarmen saqtalatynyn aıtady.

«Árıne, AQSh dollarynyń ınflıatsııasy Qazaqstan ınflıatsııasynan tómendeý. Dollar ınflıatsııasy 2-4 paıyz aralyǵynda bolady. Sondyqtan Ulttyq qordyń kiristiligin dollarmen esepteımiz», - dedi ol.