Ulttyq qor aktıvteri 55 mlrd dollardan asty – Ulttyq bank

NUR-SULTAN. QazAqparat – Ulttyq qordyń aktıvteri bıylǵy qazannyń sońynda 55,1 mlrd AQSh dollaryn qurady. Bul týraly QR Ulttyq bankiniń tóraǵasy Erbolat Dosaev aıtty, dep habarlaıdy QazAqparat.

Onyń aıtýynsha, qazan aıynda 428 mlrd teńgege nysanaly jáne kepildendirilgen transfertterdi bólýdi qamtamasyz etý úshin 988 mln AQSh dollary satyldy.

«Qazanda Ulttyq qorǵa túsim 103 mlrd teńge, onyń ishinde shetel valıýtasynda 163 mln AQSh dollary boldy. Bul aıda Ulttyq qordyń ınvestıtsııalyq kirisi naryqty túzetýden keıin qalpyna kelip, tek aktsııalar men altynnyń ósýi esebinen 871 mln. AQSh dollary boldy. Investıtsııalyq kiris Ulttyq qor aktıvteriniń teńgerimdi allokatsııasy esebinen jyl basynan beri qalpyna keldi jáne 2 mlrd. AQSh dollary nemese 3,44% boldy», - dedi E. Dosaev Úkimet otyrysynda.

Sonymen birge, altynvalıýta rezervteri bıylǵy qazannyń sońynda 35,8 mlrd AQSh dollaryn qurap, bir aıda 307 mln AQSh dollaryna artqan.

«Altyn portfeli altyn baǵasynyń bir ýntsııasy úshin 1796 AQSh dollaryna deıin 3,8%-ke ósýi esebinen 1,2 mlrd AQSh dollaryna ósti. Erkin konvertatsııalanatyn valıýtadaǵy aktıvter negizinen ekinshi deńgeıdegi bankterdiń korrespondenttik shottaryndaǵy qaldyqtardyń tómendeýi esebinen 854 mln AQSh dollaryna azaıdy. Jalpy halyqaralyq rezervterdiń barlyǵy bir aıda 354 mln.AQSh dollaryna ulǵaıyp, 90,9 mlrd AQSh dollaryn qurady», - dep túsindirdi Ulttyq bank tóraǵasy.