Ulttyq komıssııa sarapshylary áıelder jumyssyzdyǵymen kúresýdiń naqty sharalaryn usyndy

ASTANA. QazAqparat – Búgin Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysynda áıelder jumyssyzdyǵyn tómendetý jónindegi sharalar máselesi qaraldy, dep habarlaıdy QazAqparat.

«Áıelder jumyssyzdyǵy problemasy – qoǵamnyń áleýmettik damýynyń eń sezimtal kórsetkishi. Máseleni sheshý profılaktıkalyq sharalar keshenin qalyptastyrýdyń jańa tásilderin izdeýdi, sondaı-aq jumyspen qamtýǵa baǵyttalǵan ýákiletti organdardyń is-áreketterindegi problemalardy anyqtaýdy jáne sheshýdi talap etedi», - dep atap ótti otyrysty ashqan Ulttyq komıssııa tóraǵasy, QR Prezıdenti Ákimshiligi basshysynyń orynbasary Aıda Balaeva.

Ulttyq komıssııanyń saraptamalyq toby bul máseleni egjeı-tegjeıli zerdelep, áıelder arasyndaǵy jumyssyzdyqty eńserý boıynsha naqty aldyn alý sharalaryn qabyldaý úshin, eń aldymen salalar men óńirler bólinisinde genderlik alshaqtyqty (áıelder atqaratyn jumys oryndarynyń úlesi) taldaý qajet degen qorytyndyǵa keldi.

JOO men TjKB túlekterin jumysqa ornalastyrý boıynsha derekter, genderlik aspekt pen óńirler bólinisinde NEET sanatyndaǵy jastar boıynsha kórsetkishter áıelder jumyssyzdyǵyna qarsy kúres salasynda táýekelderdiń aldyn alý boıynsha ýaqtyly jáne naqty aldyn alý sharalaryn qabyldaýǵa yqpal etedi.

«Halyqty jumyspen qamtý týraly» Zańǵa sáıkes memleket kemsitýshiliktiń kez kelgen túrinen qorǵaýǵa jáne kásip pen jumys alý múmkindikteriniń teńdigine, jumyspen qamtý jáne eńbek jaǵdaılaryn tańdaýǵa negizdelgen halyqty jumyspen qamtýǵa járdemdesý sharalaryn qamtamasyz etedi», - dep atap ótti áıelderdi jumyspen qamtýdyń qazirgi jaǵdaıy týraly baıandaǵan Eńbek jáne halyqty áleýmettik qorǵaý mınıstri Tamara Dúısenova.

Qazirgi ýaqytta halyqty jumyspen qamtý «2021-2025 jyldarǵa arnalǵan kásipkerlikti damytý jónindegi ulttyq joba» sheńberinde iske asyrylady.

Alaıda, memleket qabyldaıtyn sharalardyń keń aýqymyna qaramastan, Qazaqstanda áıelder jumyssyzdyǵynyń deńgeıi joǵary bolyp qalyp otyr. Máselen, 2022 jylǵy 4 toqsannyń qorytyndysy boıynsha 5,5% (QR boıynsha – 4,8%) boldy. Áıelder jumyssyzdyǵynyń eń joǵary deńgeıi Mańǵystaý oblysynda – 7,0%, Abaı oblysynda – 6,8%, Túrkistan oblysynda – 6,7%, Jetisý oblysynda – 6,5%.

Ulttyq komıssııa sarapshylary áıelderdiń jumyspen qamtylýyn baǵalaý úshin dınamıkadaǵy kórsetkishterdiń tizbesin daıyndady, olar óńirler bólinisinde áıelder jumyssyzdyǵynyń jalpy kórinisin kórýge kómektesedi jáne áıelderdi jumyspen qamtý boıynsha naqty sharalar qabyldaýǵa múmkindik beredi.

Ulttyq komıssııa áıelderdiń tabysy men jumyssyzdyǵy boıynsha genderlik alshaqtyqty zerdelep, Astana hab-pen birlesip áıelderge frılanserlik platformalarda aqsha tabýǵa kómektesetin baǵdarlamany iske qosýdy usynady. Bul bastama áıelderge ıkemdi tabys kózin qamtamasyz etýge jáne olardyń qarjylyq táýelsizdigin ilgeriletýge múmkindik beredi.

Baǵdarlamany Ulttyq komıssııa múshesi, Astana Hub halyqaralyq tehnoparkiniń basqarýshy dırektory A. Ábdirahmanova tanystyrdy.

Ulttyq komıssııanyń otyrysyna sarapshylar qoǵamdastyǵynyń ókilderi, óńirler ákimderiniń orynbasarlary, ortalyq memlekettik organdardyń basshylary qatysty.

Otyrys qorytyndysy boıynsha Ulttyq komıssııa tóraǵasy A. Balaeva memlekettik organdarǵa birqatar tapsyrma berdi.